ԵՐԵՎԱՆ, 11 հոկտեմբերի – Sputnik. 2022 թ. հունվարի 1-ից Հայաստանում կարգելվի մինչև 50 միկրոն հաստությամբ պոլիէթիլենային տոպրակների իրացումը։ Տեղեկությունը հայտնում է ՀՀ շրջակա միջավայրի նախարարությունը։
Պլաստիկը բնության համար դժվարամարս է ու հակառակ դրան, մարդկության կողմից խիստ առատ սպառվող: Տարեկան մոտ 5 տրիլիոն պոլիէթիլենային տոպրակ են օգտագործում ամբողջ աշխարհում: Դրանց մի մասը չի վերացվում, կուտակվում է օվկիանոսում, մնում ցամաքում ու զգալի վնաս հասցնում թե՛ կենդանական ու բուսական աշխարհին, թե՛ մարդու առողջությանը:
«Ամանորից հետո Հայաստանը կարգելի մինչև 50 միկրոն հաստության պոլիէթիլենային տոպրակների վաճառքը»,– նշված է հաղորդագրության մեջ:
Նախարարությունը հիշեցնում է` օրենսդրական փոփոխություններն արված են, տնտեսվարողների հետ աշխատանք տարվում է, և պետք է ամեն ինչ անել 2022 թվականի հունվարից օրենքի պահանջները պատշաճ կարգով կատարելու համար: