ԵՐԵՎԱՆ, 11 հոկտեմբերի – Sputnik. ՀՀ գլխավոր դատախազ Արթուր Դավթյանի հրավերով հոկտեմբերի 12-ին եռօրյա այցով Հայաստան կժամանի Իրանի գլխավոր դատախազ Մոհամմադ Ջաֆար Մոնթազերին: Տեղեկությունը հայտնում է ՀՀ գլխավոր դատախազության մամուլի ծառայությունը։
Հրավերի նպատակը երկու երկրների դատախազությունների միջև հաջողությամբ զարգացող համագործակցությանը նոր խթան հաղորդելու փոխադարձ շահագրգռությունը հավաստելն է։
«Այցի շրջանակում նախատեսված են ընդլայնված կազմով բանակցություններ երկու երկրների գլխավոր դատախազների միջև, որի ընթացքում կքննարկվեն նրանց ղեկավարած գերատեսչությունների միջև կապերի հետագա ամրապնդմանը, քրեական գործերով իրավական փոխօգնության շրջանակում միջնորդությունների կատարմանը, տարածաշրջանային և գլոբալ ընդգրկում ունեցող հանցագործությունների դեմ պայքարում երկու երկրների իրավապահ մարմինների կողմից գործադրվող ջանքերի համատեղմանը և արդյունավետության բարձրացմանը, միմյանց երկրներում գտնվող քաղաքացիների իրավունքների պաշտպանությանը վերաբերող հարցեր»,- նշված է հաղորդագրության մեջ։
Նախատեսված են նաև բարձր մակարդակի մի շարք այլ հանդիպումներ:
Նշենք, որ 2013թ.-ից ի վեր սա Իրանի գլխավոր դատախազի առաջին այցն է Հայաստան։ Դրան նախորդել էր 2018թ. նոյեմբերին Մոհամմադ Ջաֆար Մոնթազերիի հրավերով ՀՀ գլխավոր դատախազի այցը Թեհրան: