ԵՐԵՎԱՆ, 9 հոկտեմբերի – Sputnik. Երևանում բացվել է «Երևանյան Բիենալե» գեղարվեստական հիմնադրամի «In ... Divided» առաջին կոլեկտիվ ցուցահանդեսը։ Latitude արտ-տարածքը երկու ամսով 6 արվեստանոցի էր բաժանվել։ Արտ-տարածքի այցելուները կարող էին իրական ժամանակում հետևել աշխատանքների ստեղծման ընթացքին։
Նկարիչների (դիզայներ Անի Չոփուրյան, քանդակագործ Սասուն Մարգարյան, քանդակագործ Հակոբ Վարդանյան, նկարիչ Գոհար Սարգսյան, նկարիչ Նարե Պետրոսյան, փորձարարական ինստալյացիաների նկարիչ՝ Մերի ) վերջնական աշխատանքները ցուցադրվում են նույն վայրում, որտեղ ստեղծվել են։
Նկարիչներն ամբողջ ընթացքում շփմա մեջ են եղել։ Չնայած բաժանմանը՝ ոչ միայն տարածքում, այլև աշխատանքային ոճերում, արվեստագետները միավորվել էին միևնույն՝ գեղեցիկը ստեղծելու գաղափարի շուրջ։
Այս յուրահատուկ ցուցահանդեսը կազմակերպելը հեշտ չի եղել։ «Երևանյան Բիենալե» գեղարվեստական հիմնադրամի տնօրեն Էլլա Կանեգարիանի խոսքով՝ անդադար գործել էր պետք։ Ցուցահանդեսի գաղափարները մշտապես փոփոխվում էին, քանի որ վերջնական արդյունքի մասին ամբողջական պատկերացում չկար։
«Ցանկացած ցուցահանդես երկխոսություն է նկարչի հետ․ համադրողի զրույցը նկարչի և նրանց երկուսի զրույցը՝ հանդիսատեսի հետ։ Երբ ցուցադրությունը կոլեկտիվ է, երգչախումբ է դառնում։ Մարդիկ ոչ թե իրար հետ կամ քեզ հետ են խոսում, այլ հավասարաչափ։ Այդ դեպքում գրեթե անհնար է լսել նրանց»,-ասում է Էլլան։
Կազմակերպիչներն ուզում են մի շարք հարցերի պատասխաններ գտնել։ Օրինակ՝ արդյո՞ք համագոյակցության գաղափարը սահմանափակումներ է ստեղծում, որոնք խանգարում են բացահայտել մարդու իրական էությունը, թե՞ յուրահատուկը ստեղծվում է այդ սահմանափակումների համատեքստում։
Այցելուն կարող է ինքնուրույն փնտրել պատասխանները։ Ցուցահանդեսը բաց կլինի մինչև հոկտեմբերի 12-ը։ Մուտքն ազատ է բոլորի համար։ Աշխատանքային ժամերը՝ երեքշաբթիից ուրբաթ, 11։00- 20։00, հանգստյան օրերին՝ 16։00- 23։00։
Այս նորարարական արտ-ձևաչափը հովանավորում է Schweppes ընկերությունը։ Ցուցահանդեսի ավարտին ընկերությունը կգնի արտ-օբյեկտներից մեկը, իսկ ստացված գումարը կկիսեն վեց նկարիչների միջև։
«Երևանյան Բիենալե» գեղարվեստական հիմնադրամը, որը հիմնվել է 2019 թվականին, նպատակ ունի Հայաստանի տարածքում ժամանակակից հայկական արվեստի ներկայացման համար լայնածավալ հարթակ ստեղծել: YBAF-ը հիմնել է իտալացի Ֆաբիո Լենցին՝ «Hovnanian International» ՍՊԸ-ի հետ համատեղ։