ԵՐԵՎԱՆ, 8 հոկտեմբերի – Sputnik. Հայաստանի բանկային էլեկտրոնային համակարգն ի զորու է դիմանալ 2022 թվականից սպասվող ծանրաբեռնվածությանը։ Sputnik Արմենիայի հետ հարցազրույցում ասաց ՀՀ ֆինանսների նախարար Տիգրան Խաչատրյանը` անդրադառնալով հունվարի 1-ից օրենքի ուժ ստացող կարգավորմանը և ՀՀ անկանխիկ վճարային համակարգում հոկտեմբերի 1-2-ին գրանցված տեխնիկական խնդիրներին։
Ավելի վաղ հայտնել էինք, որ 2022-ի հունվարի 1-ից 300 000 դրամը գերազանցող գործարքները Հայաստանում կիրականացվեն բացառապես անկանխիկ եղանակով։ Կենտրոնական բանկի օրենսդրական նախաձեռնությունն արդեն արժանացել է կառավարության հավանությանը և ներկայացվել խորհրդարանի դատին։ Նոր կարգավորումը վերաբերելու է ինչպես թանկարժեք գնումներին, այնպես էլ տարբեր ծառայությունների դիմաց գանձումներին բուժհաստատություններում, բուհերում կատարվող վճարումներին, աշխատավարձերին ու այլ վճարումներին։ Հոկտեմբերի սկզբին մի քանի օր շարունակ բանկային առցանց համակարգը խափանվել էր, մարդիկ չէին կարողանում գումար կանխիկացնել բանկոմատներից և առցանց գործարքներ անել։
«Եթե անգամ 2022 կամ 2023թ–ին լինեն այդպիսի ժամանակավոր երևույթներ, դրանք շատ արագ ժամերի ընթացքում կարգավորվելու են. եթե մեկը որոշի առևտուր անել, ինչ–որ ժամանակահատվածում դա հնարավոր չլինի, կարող է վստահ լինել, որ երրորդ ժամվա ընթացքում դա իրականություն կդառնա։ Այսինքն` ես այդտեղ անհանգստանալու կամ մտահոգվելու որևէ պատճառ չեմ տեսնում»,– ասաց Խաչատրյանը։
Ֆինանսների նախարարի խոսքով` անկանխիկ առևտուրն այսօր ոչ միայն Հայաստանում, այլև ամբողջ աշխարհում այլընտրանք չունի։ Տեխնիկական զարգացումը միանշանակ կյանքը տանում է այդ ուղղությամբ։
Իսկ անկանխիկ գործարքների կարգավորման միջոցով հնարավոր «մութ» գործարքները կանխելու մասին հարցին Խաչատրյանն այսպես պատասխանեց. «Գործարքը ստվերային է, թե ոչ, միայն վճարման եղանակով չի որոշվում։ Վաճառողը, որն այսօր պարտավոր է իր ստացած գումարը վճարել ՀԴՄ–ով, ինչպես այսօր է պարտավոր, այնպես էլ պարտավոր է լինելու վաղը։ Եթե խախտի, պատասխանատվության միջոցն էլ է լինելու սահմանված, ինչպես այսօր»։
Նախարարի դիտարկմամբ` ժամանակի ընթացքում մարդիկ կհասկանան, որ անկանխիկ գործարքները շատ ավելի հարմար են, ավելի թափանցիկ, հուսալի, գումարի կորստի ռիսկ էլ չկա։