ԵՐԵՎԱՆ, 8 հոկտեմբերի – Sputnik. Ադրբեջանը Սյունիքի տարածքում սահմանի իր վերահսկողության տակ գտնվող հատվածներում ակտիվ շինարարական աշխատանքների մեջ է։ Խորհրդարանական ճեպազրույցների ժամանակ այս մասին հայտարարեց «Պատիվ ունեմ» խմբակցության անդամ Տիգրան Աբրահամյանը` հավելելով, որ նոր է վերադարձել Սյունիքից։
«Ակնհայտ է, որ Սյունիքում ստեղծված անվտանգային սպառնալիքները, ռիսկերը դեռևս շարունակվում են պահպանվել։ Ադրբեջանի կողմից արվող շինարարական աշխատանքներն ունեն և՛ ռազմական, և՛ քաղաքացիական նշանակություն։ Շատ մտահոգիչ է նաև Սյունիքի հարակից՝ Ադրբեջանի կողմից վերահսկվող, այսինքն՝ Արցախից բռնազավթված հատվածներում Ադրբեջանի կողմից արվող աշխատանքները»,-ասաց Աբրահամյանը։
Նրա խոսքով` ադրբեջանցիների կողմից դիրքերի ամրացումները պայմանավորված են սահմանապահ զորամասերի տեղակայման և ամրաշինական ենթակառուցվածքային աշխատանքներով։
Անդրադառնալով Տաթև-Աղվանի այլընտրանքային համարվող ճանապարհին` Աբրահամյանը նշեց, որ այն մի քանի հարցեր լուծելու է, սակայն Սյունիքի անվտանգության հետ կապված ամբողջ հարցը չի կարող լուծել։
Հիշեցնենք, որ երեկ իրանական «Մեհր» գործակալությունը հայտնել էր` իրանական պատվիրակությունը ժամանել է Երևան՝ քննարկելու Իրանի մասնակցությունը Հայաստանում տարանցիկ ճանապարհի կառուցման աշխատանքներին։
ՀՀ կառավարությունն ավելի վաղ հայտնել էր, որ Տաթևից մինչև Սյունիքի մարզի Աղվանի գյուղ 43 կիլոմետրանոց ճանապարհահատվածն ամբողջովին պատրաստ ու ասֆալտապատված կլինի մինչև նոյեմբերի վերջ։ Այս ճանապարհը կապելու է Սյունիքի` 44-օրյա պատերազմից հետո սահմանամերձ դարձած համայնքները Կապանին ու Մ–2` մինչև Իրանի սահման հասնող միջպետական ճանապարհին։
Սյունիքի այլընտանքային ամբողջ` 79 կմ–անոց ճանապարհի կառուցումը կարժենա շուրջ 9.5 մլրդ դրամ։ Կառավարությունը խոստացել է այն ավարտին հասցնել 2021թ–ի գարնանը։