ԵՐԵՎԱՆ, 7 հոկտեմբերի – Sputnik. ՀՀ առողջապահության նախարար Անահիտ Ավանեսյանն այսօր լրագրողների հետ ճեպազրույցում պարզաբանեց կառավարության նիստում վարչապետի հնչեցրած այն հայտարարությունը, թե պետական հիմնարկների աշխատակիցների չպատրաստվելու հարցով նախարարները դիմում են իրեն։
«Ես չեմ կարծում, թե հարցը ուղիղ դիմելու մասին էր, այլ հարցը բարձրացնելու,- ասաց Ավանեսյանը,- խոսքը վերաբերում էր ոչ թե խնդրելուն, այլ շատերը ներկայացնում են հակացուցումների իրենց պատկերացումները, որ, օրինակ, ունեն շաքարային դիաբետ ու ասում են, որ պատվաստումն իրենց ցուցված չէ»։
Այդուհանդերձ, ըստ Ավանեսյանի, պետական ապարատում այս պահին չկա մարդ, ով չունի հակացուցում ու պատվաստված չէ:
Ինչ վերաբերում է վարչապետի ներկայացրած «կեղծ պատվաստումներին», Ավանեսյանը նշեց, որ նախարարությունը բոլոր ստացած ահազանգերը փոխանցում է իրավապահներին ու առաջարկեց այդ հարցով դիմել արդեն այդ մարմիններին:
Հիշեցնենք՝ կառավարության այսօրվա նիստում ՀՀ վարչապետ Նիկոլ Փաշինյանը իրավապահ մարմիններին հրահանգել էր շատ խիստ միջոցներով պայքարել Հայաստանում առկա կեղծ պատվաստումների դեմ:
«ԱԱԾ-ին և ոստիկանությանը. կեղծ պատվաստումների մասին ահազանգ` ես էլ չլսեմ։ Ձերբակալե՛ք, կալանավորե՛ք: Էդ բժիշկների նկատմամբ, ովքեր օգտվում են առիթից՝ չպատվաստելու մարդկանց և պատվաստանյութը փչացնում, շատ խիստ միջոցներ է պետք ձեռնարկել»,- ասել էր Փաշինյանը:
Նա նաև հայտարարել էր, որ կառավարության անդամները պարբերաբար դիմում են իրեն այն հարցով, որ իրենց աշխատակիցները վախենում են պատվաստվել: Վարչապետը պահանջել էր այդ հարցերով այլևս իրեն չդիմել, հարցերը լուծել տեղում: