ԵՐԵՎԱՆ, 7 հոկտեմբերի – Sputnik. Ռուսաստանը ձգտում է աշխարհաքաղաքական կայունություն ապահովել Հարավային Կովկասում։ Այս մասին այսօր ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Իրանի արտաքին քաղաքական գերատեսչության հայտարարությունը Կովկասում աշխարհաքաղաքական և քարտեզի փոփոխությունների անթույլատրելիության մասին։
Ավելի վաղ Իրանի արտգործնախարար Հոսեյն Ամիր Աբդոլլահիանը հայտարարել էր, որ Մոսկվայում կայացած բանակցություններում Ռուսաստանի արտաքին գործերի նախարար Սերգեյ Լավրովի հետ քննարկել Է Հարավային Կովկասում «սիոնիստների և ահաբեկիչների» ներկայության հարցը:
«Մենք ելնում ենք Հարավային Կովկասի տարածաշրջանում աշխարհաքաղաքական կայունության և անվտանգության ապահովման խնդիրների առաջնահերթ բնույթից։ Մեր երկիրը վարում է համապատասխան համալիր քաղաքականություն, այդ թվում՝ տարածաշրջանային բոլոր խաղացողների հետ երկխոսության միջոցով»,-ասել է ՌԴ ԱԳՆ պաշտոնական ներկայացուցիչը։
Նախօրեին, Զախարովայի խոսքով, Ռուսաստանի և Իրանի արտգործնախարարները քննարկել են համագործակցության«3+3» ձևաչափը։ Նրա խոսքով՝ «իրանցի բարեկամները դրական վերաբերմունք ունեն այդ նախաձեռնությանը»։
Ռուսաստանի և Իրանի արտգործնախարարները հոկտեմբերի 6-ին երկկողմ բանակցություններ են վարել՝ քննարկելով մի շարք միջազգային խնդիրներ, այդ թվում՝ իրավիճակը Հարավային Կովկասում: