ԵՐԵՎԱՆ, 7 հոկտեմբերի – Sputnik. Հայաստանում ներկա պահին կորոնավիրուսով հիվանդների բուժման գործընթացում ներգրավված է 20 հիվանդանոց, որոնցում ներկա պահին զբաղված է 2226 մահճակալ:
Այս մասին այսօր ՀՀ կառավարությունն նիստում հայտնեց ՀՀ առողջապահության նախարար Անահիտ Ավանեսյանը: Նա նաև հայտնեց, որ ներկա պահին ՀՀ-ում գրանցված 14 000 վարակվածների մեջ հիվանդանոցային բուժման կարիք ունեցող պատվաստված քաղաքացիների թիվը 176 է:
«Սա ի՞նչ է ցույց տալիս: Որ պատվաստումները կանխում են հիվանդության ծանր ու ծայրահեղ ծանր վիճակները, և բեռ առողջապահական համակարգի վրա չի գոյանում»,- ասաց Ավանեսյանը՝ շեշտելով, որ Հայաստանում կան մարդիկ, ովքեր հետևողականորեն խանգարում են պատվաստման գործընթացին՝ հակաքարոզչություն իրականացնելով:
Վարչապետ Նիկոլ Փաշինյանն էլ հայտարարեց, որ դրա հետևում քաղաքական նպատակ կա:
«Նրանց պետք է, որ հնարավորինս շատ մարդ մահանա, որ ասեն, որ կառավարությունը չի կարողանում կորոնավիրուսի դեմ պայքարել,- ասաց նա՝ հրահանգելով,- վարչական լծակները գործադրեք, պետք է պատվաստումը գնա առաջ: Ես առողջապահության նախարարությունից չեմ ուզում լսել բողոք, որ խանգարում են պատվաստման գործընթացներին»:
Փաշինյանը նաև նախարարներին հրահանգեց՝ այսուհետ պատվաստումների հետ կապված հարցերով իրեն չդիմել:
«Ինձ մի ասեք՝ ով է խանգարում: Խնդիր եմ դրել, գնացեք լուծեք: Վատ է, շատ վատ է պատվաստման թվերը: Եվ որևէ մեկից չբողոքեք: Սա վերաբերում է դահլիճում նստած բոլոր մարդկան, որ գալիս եք, ասում եք՝ էսինչ աշխատողը վախենում է պատվաստումից: Պետական կառավարման համակարգում մարդ չպիտի լինի, որը պատվաստված չինի»,- ասաց վարչապետը:
Քննարկման ավարտին կառավարությունը որոշում ընդունեց 2 մլրդ 365 մլն դրամ գումար հատկացնել կորոնավիրուսի վարակի կանխարգելմանը, վերահսկմանն ու կորոնավիրուսով հիվանդ քաղաքացիների՝ պետպատվերի շրջանակներում բուժմանը:
Նախագիծը կառավարության նիստում ներկայացնելով՝ Անահիտ Ավանեսյանն ասաց.
Իհարկե, մենք շատ ուրախ կլինեինք, որ այս միջոցներն ուղղվեին այլ կարիքների բավարարմանը, այլ հիվանդությունների բուժմանը, որովհետև եթե մենք բավարար չափով պատվաստման գործընթացն իրականացնեինք ու իրականացնենք, պետք է, որ նման գումարների ծախսման կարիք չունենանք»: