ԵՐԵՎԱՆ, 6 հոկտեմբերի - Sputnik. Հոկտեմբերի 1-ից ուժի մեջ մտած պարտադիր պատվաստվելու կամ ՊՇՌ թեստ հանձնելու մասին ՀՀ առողջապահության նախարարի հրամանում առաջիկայում կարող է փոփոխություն արվել։ Այս մասին այսօր ԱԺ–ում կառավրության հետ հարցուպատասխանի ժամանակ հայտնեց նախարար Անահիտ Ավանեսյանը։
«Մեր մասնագիտական խումբը ներկայում որոշակի փոփոխությունների և համալրումների աշխատանք է իրականացնում նախարարի հրամանին, և կտեսնենք, երբ որ վերջնական եզրակացությունը վաղը կունենանք, ըստ այդմ կդիտարկենք, թե հիվանդանալ– լավանալուց հետո ինչքան ժամանակ անց մենք կպարտադրենք ՊՇՌ թեստի պատասխան ներկայացնել կամ պատվաստման հավաստագիր»,– ասաց Ավանեսյանը։
Նրա մեկնաբանմամբ, խնդիրը ծագել է այն բանից հետո, երբ պարզվել է, որ կորոնավիրուսով վարակվելուց ու լավանալուց որոշ ժամանակ անց շատ պացիենտների թեստի պատասխանը դեռ շարունակում է դրական ստացվել։
Առողջապահության նախարարի օգոստոսի 20-ի հրամանով սահմանվել է, որ հոկտեմբերի 1-ից սկսած ՀՀ աշխատողները պարտավոր են գործատուին ներկայացնել կա՛մ COVID-19-ի դեմ պատվաստման սերտիֆիկատ, կա՛մ յուրաքանչյուր 14 օրը մեկ` COVID-19-ի ախտորոշման ՊՇՌ հետազոտության բացասական արդյունքը հավաստող առավելագույնը 72–ժամյա վաղեմությամբ փաստաթուղթ։ Հետագայում պարզաբանվեց, որ հրամանը գործում է հոկեմբերի 14-ից։