ԵՐԵՎԱՆ, 6 հոկտեմբերի - Sputnik. Ամեն ինչի պատասխանատուն էլ, մեղավորն էլ ես եմ։ Նման հայտարարություն այսօր ԱԺ ամբիոնից արեց ՀՀ վարչապետ Նիկոլ Փաշինյանը` պատասխանելով արցախյան 44-օրյա պատերազմին ու մասնավորապես` Լելե Թեփե կոչվող բարձունքի գրավման մասին` «Հայաստան» դաշինքի պատգամավոր Արենուհի Կյուրեղյանի հարցին։
«Ես այս ամբիոնից բազմաթիվ անգամ եմ հայտարարել, որ ամեն ինչի պատասխանատուն էլ, մեղավորն էլ ես եմ,– ասաց Փաշինյանը,– ինչ վերաբերում է ձեր նշած դրվագին, դրա վերաբերյալ տրվել են բազմաթիվ պարզաբանումներ։ Ես էլ եմ տվել պարզաբանումներ և եթե պետք լինի` նորից կտամ։ Ես եղել եմ Ստեփանակերտում, հրավիրել եմ խորհրդակցություն և լսել եմ մարդկանց կարծիքները, թե ինչ կարող ենք անել իրադրությունը փոխելու վերաբերյալ։ Հնչել են առաջարկներ, որոնք ես խնդրել եմ, որ զինվորականները գնահատեն և կայացնեն որոշում»։
Փաշինյանը նաև նշեց, որ Լելե Թեփե անունն ինքն ընդհանրապես չի տվել։ Նրա խոսքով` «Լելե Փեթե» օպերացիա ընդհանրապես չի եղել։
«Այդ հետո է մտել շրջանառության մեջ` պրոպագանդիստական առումով, թե, իբր, ես ասել եմ` Սերժ Սարգսյանը 2016թ–ին Լելե Թեփեն կորցրել է, ինձ համար ունի քաղաքական նշանակություն, գնացեք, Լելե Թեփեն վերցրեք։ Այդպիսի բան չի եղել և չէր էլ կարող լինել»։
Հարցին, թե ինչու Փաշինյանը չի ընդունել պատերազմը դադարեցնելու` հոկտեմբերի 7-ի առաջարկը, ՀՀ վարչապետը պատասխանեց. «Հոկտեմբերի 7-ի առաջարկն ընդունվել է, պայմանավորվածությունը ձեռք բերվել է, որի արդյունքում ՀՀ ԱԳ նախարարը մեկնել է, Ադրբեջանի, ՌԴ ԱԳ նախարարների հետ ստորագրվել է փաստաթուղթ, հրապարակվել է, մեր հանրության կողմից լայնորեն ողջունվել է, ընդունվել է, բայց Ադրբեջանը չի կատարել դա»։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: