ԵՐԵՎԱՆ, 5 հոկտեմբերի – Sputnik. Արցախի նախագահ Արայիկ Հարությունյանը հոկտեմբերի 5-ին Ուսուցչի օրվա առթիվ ընդունել է 44-օրյա պատերազմի ընթացքում զոհված ուսուցիչների հարազատներին։ Տեղեկությունը հայտնում է Արցախի նախագահի մամուլի ծառայությունը։
«44-օրյա պատերազմը մեզանից խլեց մեր քաջ տղաներին: Հայրենիքի նվիրյալների շարքերում հայտնվեցին շատերիդ գործընկերները, սաները, հարազատները: Նրանք ընկան, որպեսզի կանգուն մնա Արցախը, որպեսզի սերունդները շարունակեն արժանապատվորեն ապրել հայրենի հողում»,-ասել է Հարությունյանը։
Հիշեցնենք, որ Ուսուցչի տոնը նշվում է 1994 թվականի հոկտեմբերի 5-ից սկսած։
Օրվա ընտրությունը կապված էր այն հանգամանքի հետ, որ 1966 թվականի հոկտեմբերի 5-ին Փարիզում ՅՈւՆԵՍԿՕ-ի և Աշխատանքի միջազգային կազմակերպության կողմից հրավիրված համատեղ կոնֆերանսում ընդունվել է «Ուսուցչի կարգավիճակի հետ կապված ուղեցույց» վերտառությամբ փաստաթուղթը, ինչն էլ ուսուցիչների աշխատանքը կարգավորող առաջին միջազգային փաստաթուղթն էր:
Ուսուցիչների տոնը նշվում է ավելի քան 100 երկրներում։