ԵՐԵՎԱՆ, 4 հոկտեմբերի - Sputnik. Ռուսաստանի նախագահ Վլադիմիր Պուտինն ու Հայաստանի վարչապետ Նիկոլ Փաշինյանը մոտ ժամանակներում անձնական հանդիպում կունենան, այսօր ՀՀ ԱԺ նախագահ Ալեն Սիմոնյանի հետ հանդիպման ժամանակ ասել է Դաշնային խորհրդի նախագահ Վալենտինա Մատվիենկոն։
Նա նշել է, որ Պուտինն ու Փաշինյանն այս տարի երեք հանդիպում են ունեցել ու 14 հեռախոսազրույց, ու մոտ ժամանակներում նոր հանդիպում է սպասվում։
«ՌԴ-ի ու Հայաստանի հարաբերությունները բարեկամական ու ռազմավարական բնույթ ունեն։ Անկասկած, խորհրդարանի դերը դրանում շատ բարձր է։ Մենք բավարարված ենք նրանով, թե ինչպես է աշխատել մեր միջխորհրդարանական հանձնաժողովը»,-ասել է Դաշնային խորհրդի ղեկավարը։
Նա հիշեցրել է, որ հաջորդ տարի լրանում է ՌԴ-ի ու Հայաստանի միջև դիվանագիտական հարաբերություններ հաստատելու 30 տարին։
Ալեն Սիմոնյանի գլխավորած խորհրդարանական պատվիրակությունը եռօրյա պաշտոնական այցով Ռուսաստանում է: Նախատեսված են հանդիպումներ ՌԴ բարձրաստիճան պաշտոնյաների հետ: Այցի վերջին օրը պատվիրակությունը կհանդիպի Ռուսաստանի հայ համայնքի ներկայացուցիչների հետ: