ԵՐԵՎԱՆ, 4 հոկտեմբերի – Sputnik. Լիտվան կարևորում է խաղաղության վերահաստատման և պահպանման մեխանիզմները։ ՀՀ վարչապետ Նիկոլ Փաշինյանի հետ համատեղ մամուլի ասուլիսի ժամանակ այս մասին ասաց Լիտվայի վարչապետ Ինգրիդա Շիմոնիտեն։
«Բոլորը, այդ թվում` մենք, հույս ենք փայփայում, որ հնարավոր կլինի հակամարտության քաղաքական կարգավորմանը հասնել Մինսկի խմբի համանախագահների ներքո։ Հաճելի է լսել, որ եղել են որոշ դրական փոփոխություններ` երկու երկրի ԱԳ նախարարների հանդիպումը։ ԵՄ մակարդակով մենք մի շարք քաղաքական առաջնորդներ ունենք, որոնք ի սրտե մտածում են տարածաշրջանում խաղաղություն հաստատելու մասին և հավատացած եմ, որ գործնական քայլեր կարվեն»,- նշեց Շիմոնիտեն։
Նրա խոսքով՝ ԵՄ մակարդակում իրենք սատարում են, որպեսզի այդ կառույցի հաստատությունները մասնակից լինեն տարածաշրջանային մարտահրավերների հաղթահարմանը և աջակցություն ցուցաբերեն այդ հարցում։
«Վերջերս ԵՄ-ի և ՀՀ միջև ստորագրվեց համապարփակ և ընդլայնված գործընկերության համաձայնագիրը, ինչի հիման վրա իրականացվելու են մի շարք փոփոխություններ։ Մենք հավատացած ենք, որ եվրոպական կառույցներն իրենց աջակցությամբ շատ կարևոր դեր ունեն։ Խաղաղության վերահաստատման ու պահման մեխանիզմներն էլ են շատ կարևոր։ Մենք պատրաստ ենք Հայաստանի բարեկամը լինել նաև ապագայում»,- ընդգծեց Լիտվայի վարչապետը և հավելեց, որ պետք է ՀՀ-ի և Լիտվայի միջև հարաբերություններն ավելի բարելավվեն։
Շիմոնիտեն շեշտեց, որ այս տարի տոնում են ՀՀ-ի հետ դիվանագիտական հարաբերությունների հաստատման 30-ամյակը, և շուտով Երևանն ու Վիլնյուսը կկապակցվեն ուղիղ թռիչքներով, ինչը ժողովուրդներին թույլ կտա միմյանց պետություններն ավելի լավ ճանաչել։
Հիշեցնենք` ՀՀ վարչապետ Նիկոլ Փաշինյանը պաշտոնական այցով Լիտվա է մեկնել երեկ` հոհտեմբերի 3–ին։