«Ոսկե ծիրան» ամենամյա կինոփառատոնը մեկնարկեց մեկ րոպե լռությամբ` հարգելով Արցախյան պատերազմի զոհերի և կինոաշխարհից հեռացավ անվանի դեմքերի հիշատակը, մասնավորապես, Կիմ կի Դուկի, Ժան Պոլ Բելմոնդոյի, Բարտրան Տավեռնիեի, ինչպես նաև Ռուդոլֆ Վաթինյանի և Լևոն Աթոյանցի։
Բացի այդ, էկրանին հայտնվեց մի գրություն, որտեղ նշված էր.«Ազատություն բոլոր հայ ռազմագերիներին»։
Կինոփառատոնը բացվեց իսրայելցի կինոռեժիսոր Նադավ Լապիդի «Ահեդի ծունկը» ֆիլմով։ Տեղեկությունը և այլ մանրամասներ Sputnik Արմենիայի հետ զրույցում հայտնեց «Ոսկե ծիրանի» գեղարվեստական ղեկավար Կարեն Ավետիսյանը։
Վերջերս Կաննի կինոփառատոնին ժյուրիի հատուկ մրցանակին արժանացած ռեժիսորն անձամբ ներկա է փառատոնի բացմանը։
Չնայած կորոնավիրուսային համաճարակով պայմանավորված դժվարություններին, 18-րդ կինոփառատոնին Հայաստան կժամանեն 70 հյուրեր, իսկ կցուցադրվի ավելի քան շուրջ 80 ֆիլմ։
Ի դեպ, այս տարի «Ոսկե ծիրանը» մեկնարկեց առանց կարմիր գորգի. պատճառը մեկ տարի առաջ տեղի ունեցած 44–օրյա պատերազմն ու դրա հետևանքներն են։
Հավելենք, որ «Ոսկե ծիրան» 18-րդ միջազգային կինոփառատոնն այս տարի կանցկացվի հոկտեմբերի 3-10-ը, որին կմասնակցեն մի շարք պատվավոր հյուրեր:
«Երևանյան պրեմիերաներ» ծրագրի շրջանակում հայ հանդիսատեսին կներկայացվեն ֆիլմեր Կաննի, Բեռլինի և այլ միջազգային կինոփառատոններից: