ԵՐԵՎԱՆ, 1 հոկտեմբերի – Sputnik. Առողջապահության ոլորտում պետպատվերի վաղաժամ սպառվելը համակարգային խնդիր է, մարդիկ զրկվում են անհետաձգելի բժշկական օգնությունից։ Նման
հաղորդագրություն է տարածել ՀՀ–ում մարդու իրավունքների պաշտպան Արման Թաթոյանը` անդրադառնալով պետպատվերի սպառման պատճառով ի հայտ եկած խնդիրներին։
Օրինակ՝ մի դեպքում 1-ին խմբի զինհաշմանդամություն ունեցող անձը տարել է կաթված և հետազոտությունների, բուժսպասարկման նպատակով շտապ օգնության համար տեղափոխվել տարբեր հիվանդանոցներ: Հիվանդանոցներում հրաժարվել են նրա բուժսպասարկումն իրականացնել պետպատվերի շրջանակներում՝ պատճառաբանելով, որ սպառվել է գումարը, իսկ հիվանդանոցներից մեկում էլ հայտնել են, որ բուժսպասարկումը կիրականացվի վճարովի հիմունքներով: Որոշ ժամանակ անց նույն մարդու առողջական վիճակը վատթարացել է, առաջացել է կրկնակի կաթվածի վտանգ, և բժիշկը տրամադրել է մագնիտառեզոնանսային տոմոգրաֆիայի (ՄՌՏ) ուղեգիր, սակայն պետպատվերի շրջանակում այն իրականացնել այդպես էլ չի հաջողվել:
Որոշ դեպքերում մարդիկ բուժհաստատություններում ուղղորդվել են հետազոտությունների կամ բուժօգնության նպատակով հերթագրվել հաջորդ տարվա համար:
Մեկ այլ դեպքում հաշմանդամություն ունեցող երեխային տրամադրվել է Երևանում դժվարամատչելի հետազոտության ուղեգիր։ Երեխային հետազոտելու նպատակով մարզից տեղափոխել են Երևան, սակայն չեն կարողացել օգտվել անվճար բուժսպասարկումից պետպատվերի հատկացված քանակը սպառված լինելու պատճառով:
Թաթոյանը նկատում է, որ պետպատվերի՝ ժամանակից շուտ սպառման դեպքեր արձանագրվել են նաև նախորդ տարիներին, բայց այդ խնդիրն առաջ է եկել տարեվերջին, ոչ թե մի ամբողջ եռամսյակ առաջ կամ ինչպես ներկայում։
Հիշեցնենք, որ
Sputnik Արմենիան էլ անդրադարձել էր այս խնդրին. հաշմանդամություն ունեցող երեխաների ծնողները հայտնվել են անելանելի վիճակում` պետպատվերի ծավալների սպառման հետևանքով վերականգնողական բուժում չի տրամադրվում։ Նրանք դիմել են առողջապահության նախարարին, քանի որ երեխաների մոտ ձեռք բերած ունակությունների հետզարգացում է գնում։