ԵՐԵՎԱՆ, 30 սեպտեմբերի - Sputnik. Մոսկվան կողջունի Հայաստանի և Ադրբեջանի միջև ամենաբարձր մակարդակով շփումները: Այսօր ճեպազրույցի ժամանակ հայտարարել է ՌԴ ԱԳՆ տեղեկատվության և մամուլի վարչության պետի տեղակալ Ալեքսեյ Զայցևը:
Ըստ նրա` կանոնավոր երկխոսությունը, հատկապես բարձր մակարդակով, նպաստում է փոխըմբռնման և խնդրահարույց հարցերի լուծման կառուցողական մթնոլորտի պահպանմանը:
«Հայաստանի և Ադրբեջանի ղեկավարների հետ Ռուսաստանի նախագահ Պուտինի ինտենսիվ շփումների շնորհիվ հնարավոր եղավ դադարեցնել արյունահեղությունը Լեռնային Ղարաբաղում և ստորագրել 2020 թվականի նոյեմբերի 9-ի եռակողմ հայտարարությունները»,– ասել է Զայցևը:
Այդօրինակ հանդիպումների կազմակերպումը լուրջ նախապատրաստություն է պահանջում: Մոսկվան կարծում է, որ Մինսկի խմբի համանախագահների այցը տարածաշրջան կնպաստի դրա համար բարենպաստ պայմաններ ստեղծելուն։
Հիշեցնենք` սեպտեմբերի 24-ին ԵԱՀԿ Մինսկի խմբի համանախագահների միջնորդությամբ և մասնակցությամբ Հայաստանի արտգործնախարարը հանդիպեց Ադրբեջանի արտգործնախարար Ջեյհուն Բայրամովի հետ։
Ավելի վաղ Ադրբեջանի նախագահ Իլհամ Ալիևը France 24 հեռուստաալիքին տված հարցազրույցում ասել էր, որ դեմ չէ հանդիպել Հայաստանի վարչապետ Նիկոլ Փաշինյանին։