ԵՐԵՎԱՆ, 29 սեպտեմբերի – Sputnik. Արցախի դեմ ադրբեջանաթուրքական ագրեսիայի, ինչպես նաև Հայաստանի ինքնիշխան տարածք ադրբեջանական զորքերի ներթափանցման հետևանքով ստեղծված իրավիճակը քննարկել են ՀՀ-ում Ֆրանսիայի նորանշանակ դեսպան Անն Լույոն և ԱԳ նախարար Արարատ Միրզոյանը։ Տեղեկությունը հայտնում է ԱԳՆ-ն` հավելելով, որ Լույոն իր հավատարմագրերի պատճենն է հանձնել Միրզոյանին։
«Միրզոյանը բարձր է գնահատել Ֆրանսիայի, երկրի խորհրդարանի և անձամբ նախագահ Էմանուել Մակրոնի մեծ ուշադրությունը հայ ռազմագերիների ու քաղաքացիական պատանդների վերադարձի, ադրբեջանական վերահսկողության ներքո անցած Արցախի տարածքներում պատմամշակութային ժառանգության պաշտպանության հարցերին»,–նշված է հաղորդագրության մեջ։
Երկուստեք ընդգծվել է ԵԱՀԿ Մինսկի խմբի համանախագահության շրջանակում խաղաղ բանակցությունների վերսկսման կարևորությունը՝ հակամարտության համապարփակ կարգավորման և տարածաշրջանում կայունության ու անվտանգության հաստատման նպատակով։
Հիշեցնենք, որ Անն Լույոն դեսպան է նշանակվել 2021 թվականի օգոստոսի 25-ի հրամանագրով։ Նա փոխարինել է Ժոնաթան Լաքոտին։