ԵՐԵՎԱՆ, 27 սեպտեմբերի – Sputnik. Այսօր Երկրապահ կամավորականների միության շենքի մոտ 44-օրյա պատերազմում զոհվածներին նվիրված խաչքար բացվեց։ Արարողությանը ներկա էին պաշտպանության նախարար Արշակ Կարապետյանը, ԱԽ քարտուղար Արմեն Գրիգորյանը, Երևանի քաղաքապետ Հայկ Մարությանը, ԵԿՄ նախագահ Սասուն Միքայելյանը։
«Բոլորս էլ գիտակցում էինք, որ աղ թե ուշ պատերազմ է սկսվելու։ Սակայն, ցավոք, մենք չկարողացանք դասեր քաղել անցյալից և այսօր էլ դասեր չենք քաղում. ամեն սերունդ իր պատերազմը վարել է»,–իր ելույթում ասաց Սասուն Միքայելյանը, որի շապիկի վրա Վազգեն Սարգսյանի լուսանկարն էր պատկերված։
Նրա խոսքով` մենք պատերազմը չենք պարտվել, ուղղակի մարտի դաշտում ենք պարտվել։ Միքայելյանը, դիմելով պետական այրերին, նշեց` անորոշությունը պետք է հանեն ժողովրդի միջից և միացյալ լինենք, քանի որ կարող է նորից պատերազմի առաջ կանգնենք, կարող է ոտնձգություն լինի ՀՀ սահմանի վրա։
«Միշտ էլ պատերազմի վտանգ կա` ամեն օր կարող է պատերազմ սկսվել։ Մենք հաղթելու ենք, ժողովուրդ ջան։ Միշտ ասել եմ ու ասում եմ` ես Շուշի կմտնեմ։ Շուշիի թունելն էլ մեզ համար են կառուցում, ոչինչ»,– լրագրողների հետ զրույցում ասաց նա։
Հարցին, թե ԵԿՄ–ի և քաղաքական ղեկավարության միջև խնդիրներ կա՞ն, Միքայելյանը պատասխանեց, որ իրենք որևէ խնդիր չունեն։