ԵՐԵՎԱՆ, 24 սեպտեմբերի – Sputnik. Կառավարությունը մեկնարկում է «Հյուսիս-հարավ» ճանապարհային միջանցքի Սիսիան-Քաջարան ճանապարհահատվածի շինարարությունը։ Այս մասին որոշումն այսօր ընդունվեց գործադրի հերթական նիստում։ Այդ որոշմամբ կառավարությունը սահմանեց այս ճանապարհահատվածի առաջնահերթությունը ընդհանուր ծրագրի այլ հատվածների շինարարության նկատմամբ։
Որոշման նախագիծը ներկայացնող Տարածքային կառավարման և ենթակառուցվածքների նախարարի տեղակալ Վաչե Տերտերյանն ասաց, որ որոշման անհրաժեշտությունը պայմանավորված է մինչև Իրանի սահման անվտանգ, ապահով ու արագընթաց ճանապարհ ունենալու անհրաժեշտությամբ։
«Նախագծով նախատեսվում է իրականացնել 100 կմ/ժամ հաշվարկային արագությամբ շուրջ 60 կմ ընդհանուր երկարությամբ նոր ճանապարհ, այդ թվում՝ 4.7 կմ ընդհանուր երկարությամբ մի քանի կամուրջներով ու 12.5 կմ ընդհանուր երկարությամբ թունելներով` ելնելով մեր երկրի լանդշաֆտի առանձնահատկություններից։ Նշեմ, որ ամենաերկար թունելը Բարգուշատի թունելն է, որի երկարությունը կկազմի շուրջ 8.6 կմ»,– ասաց Տերտերյանը։
ՀՀ վարչապետ Նիկոլ Փաշինյանն էլ հավելեց, որ Սիսիան-Քաջարան ճանապարհահատվածի կառուցման համար կառավարությունը հայտարարելու է միջազգային մրցույթ։
«Սա նոր որակ կբերի մեր տնտեսությանը, մեր հաղորդակցությանը` ԻԻՀ հետ մեր տնտեսական կապերի ամրապնդմանը։ Դա որոշակի հետաքրքրություն կառաջացնի Պարսից ծոցը Սև ծովին կապելու նախագծերի շրջանակներում։ Եթե հարցը դիտարկենք ավելի լայն համատեքստում` տարածաշրջանային բոլոր կոմունիկացիաների բացման շրջանակներում, ապա այս ծրագիրը բոլորովին այլ մասշտաբ ու նշանակություն է ունենում»,– ասաց Փաշինյանը։
Նա նաև հույս հայտնեց, որ 2022թ.–ին կմեկնարկի շինարարության նախնական` տեխնիկայի մոբիլիզացիայի փուլը։
Նշենք, որ նախատեսված շինարարական աշխատանքների արժեքը կազմում է շուրջ 474.3 մլրդ ՀՀ դրամ։
Հիշեցնենք` «Հյուսիս–հարավ»` 560 կմ ընդհանուր երկարությամբ Մեղրի-Երևան-Բավրա ավտոճանապարհը կոչված է կապելու երկրի հարավային շրջանները հյուսիսային շրջանների հետ։ Արդյունքում՝ 560 կմ միջինում 50 կմ/ժ արագությամբ գործարկվող ավտոմոբիլային ճանապարհը վերակառուցվելու է միջինում 80-100 կմ/ժ արագությամբ ճանապարհի, ինչի արդյունքում նշված հատվածի հատումը ներկայիս 9-9.5 ժամից կնվազի մինչև 4.5 ժամի, կբարձրանա երթևեկության հարմարավետությունն ու անվտանգությունը:
«Հյուսիս-հարավ» ծրագրի իրականացման համար մինչ օրս վարկային պայմանագրեր են կնքվել Ասիական զարգացման (ԱԶԲ), Եվրոպական ներդրումային (ԵՆԲ) բանկերի և Եվրասիական կայունացման և զարգացման հիմնադրամի հետ: