ԵՐԵՎԱՆ, 23 սեպտեմբերի – Sputnik. Ողբերգական ավտովթար է այսօր տեղի ունեցել Վայոց Ձորի մարզում, ինչի հետևանքով երիտասարդ տղամարդ է մահացել: Ինչպես հայտնում է Shamshyan.com-ը, ժամը 17:00-ի սահմաններում 911 ճգնաժամային կառավարման կենտրոն ահազանգ է ստացվել, որ Երևան-Մեղրի ավտոճանապարհի Ջերմուկի խաչմերուկից դեպի Ջերմուկ տանող ճանապարհի 2-րդ կմ հատվածում Hyundai Galloper մակնիշի ավտոմեքենան մոտ 200 մետր գահավիժել է անդունդը:
Դեպքի վայր ժամանած փրկարարներն ու ոստիկանները Վայքի հիվանդանոցի բժիշկների հետ քաղաքացիների օգնությամբ մեծ դժվարությամբ տղամարդու դին դուրս են բերել ձորից և մոտեցրել շտապօգնության ավտոմեքենային:
Ոստիկանությունն ու քննչական բաժինը պարզում են մահացածի ինքնությունը: Դեպքի վայրում հավաքված մի քանի քաղաքացիներ Գագիկ Շամշյանին ասել են, մահացածը Վայոց Ձորի բնակիչ, 38-ամյա Սեդրակ Մարտիրոսյանն էր, ում երեկվանից հարազատները որոնում էին: