ԵՐԵՎԱՆ, 21 սեպտեմբերի – Sputnik. Անկախության օրվա առիթով ՀՀ Ազգային ժողովի նախագահ Ալեն Սիմոնյանին շնորհավորական ուղերձներ են հղել ՌԴ Դաշնային ժողովի Դաշնության խորհրդի և Պետական դումայի նախագահները։
ՌԴ ԴԺ Դաշնության խորհրդի նախագահ Վալենտինա Մատվիենկոն ընդգծել է, որ բարձր է գնահատում հայ և ռուս ժողովուրդների եղբայրական համերաշխությունը, արդյունավետ փոխգործակցության և երկու երկրների միջև դաշնակցային հարաբերությունների խորացման փոխադարձ ձգտումը:
«Մեր հարաբերությունները հիմնված են միմյանց շահերի հարգանքի վրա, ինչը համապատասխանում է Ռուսաստանի և Հայաստանի միջև երկարաժամկետ զարգացման խնդիրներին: Մեզ հաջողվել է հասնել վստահության և փոխըմբռնման բարձր մակարդակի, երկկողմ կապեր հաստատել տարբեր ոլորտներում»,- նշված է Մատվիենկոյի ուղերձում։
Նա հավելել է, որ միջխորհրդարանական համագործակցությունը նշանակալի դերակատարում ունի այդ գործընթացներում: Համոզվածություն է հայտնել, որ ռուս-հայկական միջխորհրդարանական կապերի ամրապնդումը հետայսու ևս կնպաստի միջպետական երկխոսությանն ու կհամապատասխանի երկու երկրների ժողովուրդների ազգային շահերին:
ՌԴ ԴԺ Դաշնության խորհրդի նախագահը մաղթել է Հայաստանին խաղաղություն և բարեկեցություն:
«Թող երջանկությունը, փոխըմբռնումն ու սերը տիրեն յուրաքանչյուր հայի տանը»,- նշված է ուղերձում։
ՌԴ ԴԺ Պետական դումայի նախագահ Վյաչեսլավ Վոլոդինը ևս շնորհավորել է հայ գործընկերոջն ու Հայաստանի քաղաքացիներին մաղթել խաղաղություն, կայունություն և բարեկեցություն։
Հիշեցնենք, որ այսօր` սեպտեմբերի 21–ին, ՀՀ–ն նշում է Անկախության 30–ամյա հոբելյանը։
1991 թվականի սեպտեմբերի 21-ին Հայաստանում անցկացվեց հանրաքվե, և մասնակիցների ճնշող մեծամասնությունը (99%) արտահայտվեց անկախ պետականություն կերտելու օգտին։
Քվեարկությանը մասնակցեց ընտրելու իրավունք ունեցող քաղաքացիների մոտ 95 տոկոսը։ Երկու օր անց՝ 1991 թվականի սեպտեմբերի 23-ին, Հայաստանի Գերագույն խորհուրդը հաստատեց ԽՍՀՄ կազմից հանրապետության դուրս գալու որոշումը։