ԵՐԵՎԱՆ, 21 սեպտեմբերի – Sputnik. Ցավոք, դեռևս ոչ բոլոր արժանավորներն են գնահատվել հայրենիքին մատուցած ծառայությունների համար։ Նախագահի նստավայրում պարգևատրման արարողությունից հետո իր ելույթում ասաց ՀՀ նախագահ Արմեն Սարգսյանը։
Նշենք, որ Անկախության 30-ամյակի կապակցությամբ Սարգսյանը նախագահականում պետական պարգևներ հանձնեց մի շարք զինվորականների, հրամանատարների, հետմահու պարգևներ հանձնեց պատերազմում զոհվածների հարազատներին։ Բացի այդ, տարբեր ոլորտի ներկայացուցիչներ էլ կոչումներ ստացան։
«Այսօր ձեր ստացած պարգևները հայրենիքի գնահատականն են։ Ճիշտ է, դեռևս ոչ բոլորն են գնահատվել, սակայն ինչպես ասում էր ԽՍՀՄ կրկնակի հերոս Մարշալ Բաղրամյանը` հայրենիքից նեղանալ չի կարելի։ Այսօր կարևոր է զինվորի ներկայությանն այս արարողությանը, քանի որ մի քանի օրից արցախյան 44-րդ պատերազմի տարելիցն է»,–ասաց Սարգսյանը։
Նրա խոսքով` անկախությունը ձեռք է բերվել հավաքական ջանքերով, նվիրվածության և միասնության շնորհիվ։
Սարգսյանը նշեց` վերջին մեկ տարին առավել դժվար է եղել բոլորի համար և պատերազմից մեկ տարի անց էլ բազմաթիվ չլուծված խնդիրներ ունենք` գերիներ, սահմանային չլուծված խնդիրներ։ Սակայն նախագահը շեշտեց` 30 տարիների ընթացքում մենք հաղթել ենք սովորել։
Հիշեցնենք, որ այսօր` սեպտեմբերի 21–ին, ՀՀ–ն նշում է Անկախության 30–ամյա հոբելյանը։
1991 թվականի սեպտեմբերի 21-ին Հայաստանում անցկացվեց հանրաքվե, և մասնակիցների ճնշող մեծամասնությունը (99%) արտահայտվեց անկախ պետականություն կերտելու օգտին։
Քվեարկությանը մասնակցեց ընտրելու իրավունք ունեցող քաղաքացիների մոտ 95 տոկոսը։ Երկու օր անց՝ 1991 թվականի սեպտեմբերի 23-ին, Հայաստանի Գերագույն խորհուրդը հաստատեց ԽՍՀՄ կազմից հանրապետության դուրս գալու որոշումը։