ԵՐԵՎԱՆ, 20 սեպտեմբերի - Sputnik. Ճանաչված երգչուհի Սոնա Ռուբենյանը զվարճալի անակնկալ է մատուցել հումորիստ, երաժիշտ Գարիկ Պապոյանի ծննդյան 37–ամյակի առթիվ։ Գարիկը տեսագրությունը հրապարակել է Instagram-ի իր էջում։
Հրապարակված տեսանյութում երևում է, որ Սոնան ծննդյան տորթի փոխարեն բրոկոլի է գնել ու վրան մոմեր շարել։
Նա հիշեցրել է, որ նախորդ տարի ձմերուկի վրա էին մոմեր շարել։
«Էս իմ տարեդարձի ամենաօրիգինալ ու ամենախնդալու շնորհավորանքն էր։ Ընկերներ ջան, բոլորիդ շնորհակալություն շնորհավորանքների համար, իմ թանկ մարդիկ, մերսի, որ կաք»,–գրել է Գարիկը։
Նրա հետևորդները բազմաթիվ շնորհավորանքներ են գրել ու բարի տարեդարձ մաղթել։
«Շնորհավոր, հրաշք մարդ։ Տաղանդավոր ջան, երջանիկ լինես։ Լավ էլ համով նվեր է»,–գրել են նրանք։
Նշենք, որ Գարիկ Պապոյանը ծնվել է 1984 թվականի սեպտեմբերի 20-ին Լենինականում։
2007-2010 թվականներին նրան մեծ ճանաչում բերեց "32 ատամ ակումբ" հումորային ժամանցային հաղորդումը, որում հանդես էր գալիս ոչ միայն որպես դերասան, այլև որպես սցենարիստ։
2014 թվականին նկարահանվել է «Սուպեր մամա», 2017–ին` «Սուպեր մամա 2» ֆիլմում, 2015 թվականին «Սիրո գործակից» կինոնկարում։ Պապոյանը այժմ վարում է ակտիվ ստեղծագործական կյանք։ 2016 թվականին ստեղծվեց «Գարիկ Սոնա» բենդը, որը նոր շունչ է հաղորդում հին հայկական, ինչպես նաև հայկական շոու բիզնեսի այլ աստղերի երգերին։