ԵՐԵՎԱՆ, 20 սեպտեմբերի - Sputnik. Հայաստանի եւ Ռուսաստանի միջև ապրանքաշրջանառությունը այս տարվա առաջին կիսամյակում կազմել է 1,9 մլրդ դոլար: Այսօր՝ սեպտեմբերի 20-ին, Երևանում անցկացվող «Armenian Business Forum–2021» գործարար համաժողովի բացմանը ասաց Հայաստանի փոխվարչապետ Մհեր Գրիգորյանը:
Նրա խոսքով, 2019 թվականին ապրանքաշրջանառությունն առաջին անգամ հասել է 2 միլիարդ դոլարի, իսկ 2020 թվականին գրանցվել է փոքր անկում:
«Առևտրի շրջանառությունը 2021 թվականի առաջին կիսամյակում կազմել է 1,9 մլրդ դոլար», - ասաց Գրիգորյանը: Անցած տարվա համեմատ աճը կազմել է 16%: Ավելին, Հայաստանից արտահանումն աճել է 36%-ով, իսկ ներմուծումը `6%-ով: Ինչպես նշեց Գրիգորյանը, արտահանումն աճել է այնպիսի ճյուղերում, ինչպիսիք են մեքենաշինությունը, թեթև արդյունաբերությունը, սննդամթերքը, քիմիական արդյունաբերությունը, թանկարժեք քարերը և այլն:
Նշենք, որ համաժողովի շրջանակներում այսօր նախատեսված է «Ռուս-հայկական տնտեսական համագործակցություն. խոստումնալից նախագծեր» խորագրով կլոր սեղան, որում նախատեսված է Հայաստանի և Ռուսաստանի փոխվարչապետներ Մհեր Գրիգորյանի և Ալեքսեյ Օվերչուկի, Հայաստանում Ռուսաստանի դեսպան Սերգեյ Կոպիրկինի, ՀՀ էկոնոմիկայի նախարարության ղեկավար Վահան Քերոբյանի, Ռուսաստանի տնտեսական զարգացման փոխնախարար Դմիտրի Վոլվաչի, Հայաստանի բարձր տեխնոլոգիական արդյունաբերության նախարար Վահագն Խաչատուրյանի, Երևանի քաղաքապետ Հայկ Մարությանի, ինչպես նաև քաղաքական գործիչների և գործարարների ելույթներ:
Համաժողովի շրջանակներում նախատեսված է նաև դռնփակ քննարկում` հայ–ռուսական համագործակցության կոնկրետ ծրագրերի շուրջ։
Նույն օրը երեկոյան Dvin Music Hall-ում նախանշված է համաժողովի բացման պաշտոնական արարողությունը, որին ներկա կլինի ու ելույթով հանդես կգա նաև ՀՀ վարչապետ Նիկոլ Փաշինյանը։ Ներկա կլինեն նաև գործարարներ` «Տաշիր» խմբի նախագահ Սամվել Կարապետյանը, Comedy Club Production-ի հիմնադիր և գլխավոր պրոդյուսեր, «Գազպրոմ-Մեդիա Հոլդինգ» ԲԲԸ ժամանցային հեռուստաալիքների ղեկավար Արթուր Ջանիբեկյանը, Ռուսաստանի զարգացման պետական կորպորացիայի փոխնախագահ Դանիել Ալգուլյանը, «Մուլտի գրուպ» կոնցեռնի ղեկավար Գագիկ Ծառուկյանը և ուրիշներ։
Ռուս-հայկական տնտեսական համաժողովը կազմակերպել է Ռուսաստանի հայ ձեռնարկատերերի ասոցիացիան, որի հիմնադիրն ու նախագահը «Տաշիր» ընկերությունների խմբի ղեկավար Սամվել Կարապետյանն է:
Նշենք, որ Sputnik Արմենիա լրատվական գործակալությունը համաժողովի տեղեկատվական հովանավորներից է։