ԵՐԵՎԱՆ, 20 սեպտեմբերի - Sputnik. Հայաստան–Ռուսաստան–Ադրբեջան եռակողմ բանակցային խմբի վերջին հանդիպումը կայացել է օգոստոսի կեսերին, Մոսկվայում։ Այս մասին այսօր Երեւանում հայ-ռուսական գործարար համաժողովի ընդմիջմանը լրագրողների հետ ճեպազրույցում ասաց ՌԴ փոխվարչապետ Ալեքսեյ Օվերչուկը:
«Բոլոր կողմերը տրամադրված են տարածաշրջանում տրանսպորտային ու տնտեսական կապերի ապաշրջափակման։ Իհարկե, քննարկվում է` ինչպես դա անել։ Բայց բնական է, որ տրանսպորտային երթուղիների վերականգնումը թույլ կտա զգալի նոր հնարավորություններ ստեղծել ապրանքաշրջանառության ծավալների մեծացման համար։ Հանուն դրա էլ մենք աշխատում ենք»,– ասաց Օվերչուկը։
ՀՀ փոխվարչապետ Մհեր Գրիգորյանն էլ հայտնեց, որ սահմանների դելիմիտացիայի ու դեմարկացիայի ուղղությամբ որևէ կոնկրետ պայմանավորվածություն չկա։
Պայմանավորվածությունների վերաբերյալ մամուլում առկա տեղեկությունները, մասնավորապես` Սյունիքով տրվող ճանապարհի դիմաց ադրբեջանական կողմի վճարելու մասին տեղեկությունները Գրիգորյանը հերքեց` ասելով. «Վստահ եմ, որ այդ տեղեկությունները չեն համապատասխանում իրականությանը»։
Հիշեցնենք` «Հրապարակն» օրերս գրել էր, որ ՀՀ պաշտպանության նախարարի գլխավորած պատվիրակությունը Մոսկվայում բանակցություններ է վարում ադրբեջանական կողմի հետ, այսպես կոչված, «խաղաղության պայմանագրի» շուրջ: Ըստ թերթի աղբյուրի, բանակցություններն ավարտվել են, հայկական կողմը շատ գոհ է մնացել արդյունքներից:
Հաջողվել է պայմանավորվել սկսել դեմարկացիայի և դելիմիտացիայի գործընթացը՝ առանց Արցախի կարգավիճակի ֆիքսման, Սովետական Միության քարտեզների շրջանակներում: Հաջողվել է նաև անորոշ ժամանակով երկարաձգել ռուսական կողմի ներկայությունն Արցախում`առանց 5 տարվա սահմանափակումների: