ԵՐԵՎԱՆ, 19 սեպտեմբերի – Sputnik. ՀՀ Կոտայքի մարզի Քասախ համայնքի երկու բնակիչների անհետանալու հարցով ՀՀ մարդու իրավունքների պաշտպան Արման Թաթոյանը զրուցել է Հայաստանում Կարմիր խաչի միջազգային կոմիտեի պատվիրակության ղեկավար Թիերի Ռիբոյի հետ: Տեղեկանում ենք Թաթոյանի ֆեյսբուքյան էջում արված գրառումից։
ԱԱԾ–ն այսօր հայտնել էր, որ սեպտեմբերի 18-ին, ժամը 21:00-ի սահմաններում տեղեկություններ են ստացվել, որ Կոտայքի մարզի Քասախ համայնքի 2 բնակիչներ շեղվել են ուղուց և Ադրբեջանի վերահսկողության տակ գտնվող տարածքում հայտնվել։
"Հայաստանում ԿԽՄԿ պատվիրակության ղեկավարին տեղեկացրել եմ խնդրի մասին, փոխանցել մեր ձեռք բերած տվյալները և խնդրել հարցը պահել անմիջական ուշադրության ներքո",–գրել է Թաթոյանը։
Բացի այդ, ՄԻՊ աշխատակազմը խոսել է ՀՀ ԱԱԾ-ի հետ, որը հաստատել է` Քասախից մեր հայրենակիցները շեղվել են ճանապարհից ու հայտնվել այնպիսի հատվածում, որ ներկայում գտնվում է ադրբեջանական վերահսկողության ներքո: Թաթոյանը վստահեցնում է` ԱԱԾ-ն ակտիվ միջոցներ է ձեռնարկում այս պահին մեր հայրենակիցներին վերադարձնելու համար:
«Ինքս խոսել եմ անհետացածների ընտանիքների անդամների հետ: Այս քննարկումից էլ է ենթադրվում, որ շեղվել են»,–հավելել է Թաթոյանը։
Նա շեշտել է` մենք ինքներս պետք է ստեղծենք մեր իրավունքների պաշտպանության ու անվտանգության երաշխիքներ. մինչև դա չանենք, այսպիսի դեպքերը չեն վերանալու: Միշտ լինելու է անորոշություն:
Հիշեցնենք, որ Քասախի համայնքապետ Արա Մկրտչյանը Sputnik Արմենիայի հետ զրույցում հայտնել էր, որ Ադրբեջանի վերահսկողության տակ գտնվող տարածքում հայտնված Քասախի բնակիչները 21 տարեկան տղաներ են։
Երբ Ադրբեջանի վերահսկողության տակ գտնվող տարածք են մտել, տղաներից մեկն իր ընտանիքի անդամներից մեկի հետ խոսելիս է եղել։ Նա ասել է. «սրանք մեզ կանգնեցրին»", և կապն ընդհատվել է: Դրանից հետո նրանցից որևէ լուր չկա։