Պատվաստվիր, ստացիր թատրոնի տոմս. Երևանում ակցիա է անցկացվել

ԵՐԵՎԱՆ, 19 սեպտեմբերի – Sputnik. Երևանի Հյուսիսային պողոտայի շարժական պատվաստումային կետում այսօր պատվաստված քաղաքացիները ստացել են Երևանի Դրամատիկական թատրոնի ներկայացման տոմսեր։ Տեղեկությունը հայտնում է ՀՀ առողջապահության նախարարությունը։

Տեղեկացվում է, որ խրախուսական ակցիան կշարունակվի նաև վաղը Հյուսիսային պողոտայի և Կասկադի տարածքներում տեղակայված շարժական պատվաստումային կետերում, որտեղ պատվաստված քաղաքացիները կստանան մշակութային միջոցառման տոմսեր:

Քաղաքացիների խրախուսման ակցիան կազմակերպվել է առողջապահության նախարար Անահիտ Ավանեսյանի նախաձեռնությամբ՝ Հայաստանում COVID-19-ի դեմ պատվաստումային գործընթացը խթանելու նպատակով։

Նշենք, որ Վրաստանում սեպտեմբերի 13-ից մեկնարկել է խոշոր դրամական վիճակախաղ COVID-19-ի դեմ պատվաստվածների համար:

Ամեն օր խաղարկվելու են 100 և 500 լարի (32 և 160 դոլար), իսկ շաբաթական՝ 1000 -ից մինչև 10 000 լարի (320-ից մինչև 3200 դոլար) մրցանակներ: Տարեվերջին կլինի եզրափակիչ խաղարկություն՝ 100 հազար լարի մրցանակային ֆոնդով (32 հազար դոլար):

Իսկ Մոսկվայում պատվաստվածները հնարավորություն ունեն բնակարան շահելու։