ԵՐԵՎԱՆ, 19 սեպտեմբերի – Sputnik. Իրանը հույս ունի, որ ադրբեջանական ոստիկանների կողմից ձերբակալված երկու իրանցի վարորդներն անհապաղ ազատ կարձակվեն։ Մամուլի ասուլիսի ժամանակ հայտնել է Իրանի ԱԳՆ ներկայացուցիչ Սաիդ Խատիբզադեն, տեղեկանում ենք իրանական Irna-ից։
Սեպտեմբերի 15-ին հայտնի դարձավ, որ Գորիս-Կապան ավտոճանապարհի վրա ադրբեջանցի ոստիկանները ձերբակալել են իրանական երկու բեռնատարի վարորդների։
«Իրանը հետևում է զարգացումներին և հույս ունենք, որ իրանցի 2 վարորդներն անհապաղ ազատ կարձակվեն։ Հուսանք, որ երկու երկրների պաշտոնատար անձանց հանդիպումը խնդրի կայուն լուծման կտանի»,–ասել է Խատիբզադեն` չմանրամասնելով, թե ինչ հանդիպման մասին է խոսքը։
Հիշեցնենք, որ այս տարվա սեպտեմբերի 9-ին Սյունիքի մարզի Որոտան գյուղի հատվածում ադրբեջանցիները ոստիկանական հենակետ են բացել։ Սեպտեմբերի 11-ից նրանք կանգնեցնում են բեռնատարներին և ստուգում վարորդների փաստաթղթերը։
ԱԺ «Քաղաքացիական պայմանագիր» խմբակցության պատգամավոր Էդուարդ Աղաջանյանը, բացատրելով իրողությունը, ասել էր, թե իբր ադրբեջանցիների տեղակայված տեղը ժամանակին եղել է Խորհրդային Ադրբեջանի տարածքում։