Ընթացիկ շաբաթը լեցուն էր իրադարձություններով, որոնք չեն վրիպել Sputnik Արմենիայի լուսանկարիչների ֆոտոխցիկներից։
«Հայաստան» խմբակցության պատգամավոր Գեղամ Նազարյանն ԱԺ–ում հարց էր ուղղել վարչապետ Նիկոլ Փաշինյանին` Անկախության օրվա «գունագեղ միջոցառման» մասին, սակայն իր ուզած պատասխանն այդպես էլ չի ստացել։
Երեքշաբթի օրն աշխատանքային այցով ՀՀ էր ժամանել Սլովակիայի ԱԳ նախարար Իվան Կորչոկը, որն իր հայ գործընկերոջ` Արարատ Միրզոյանի հետ հանդիպեց և ասուլիսով հանդես եկավ։
Սեպտեմբերի 16-ը հակկանշական էր գյումրեցիների համար` «Շիրակ» օդանավակայան եկած ուղևորներն արդեն կօգտվեն ժամանման նոր սրահից. ժամանման վերանորոգված սրահը բացել է իր դռները։
Գրքի սիրահարները նույնպես այս շաբաթվա ընթացքում անակնկալ ունեին` այսուհետ կսկսի գործել Հայաստանի ու Ռուսաստանի բարերարների և հասարակական կազմակերպությունների ջանքերով ստեղծված "Ռուսական գրքի տուն" ոչ պետական մշակութային կենտրոնը։ Կենտրոնում առկա է ռուսերեն հրատարակությունների լայն տեսականի։
Չնայած շատերի բողոքին, Հանրապետության հրապարակում պատրաստվում են Անկախության տոնին։ Հենց Անկախության տոնին նախապատրաստվելու ընթացքում զոհված զինվորների հարազատները և մի խումբ քաղաքացիներ բողոքի ակցիա էին անում։ Ակցիայի ընթացքում նաև բերման ենթարկվածներ եղան։
Այս շաբաթ հայ-ադրբեջանական սահմանին տիրող իրավիճակը շարունակում էր մնալ ուշադրության կենտրոնում. իրանական բեռնատարների վարորդներն ադրբեջանական ոստիկանների խոչընդոտներն են հաղթահարում երթևեկելու համար։
Մինչ որոշ իրանական բեռնատարներ Գորիս-Կապան ճանապարհին խցանման մեջ կանգնած էին, մյուսները փորձում էին այլ ճանապարհով հասնել նախանշված վայր։
Sputnik Արմենիայի թղթակիցներն այցելել էին Սյունիքի մարզ և ներկայացրել, թե ինչ իրավիճակ է այնտեղ։ Կապան–Գորիս ճանապարհին "գերի" մնացած իրանական բեռնատարների վարորդները սպառնում են փակել ճանապարհը, որովհետև ադրբեջանական անցակետն անցնելու համար նրանցից գումար են պահանջում։
Այս օրերին նաև Հայաստանում գտնվող ՌԴ քաղաքացիները հնարավորություն ունեն մասնակցել Պետդումայի ընտրություններին։ ՀՀ–ում բացված 6 ընտրատեղամասերում էլ նրանք քվեարկության են մասնակցում։
Շաբաթն ավարտվեց «Հայաստան 2020-ից Հայաստան 2041» միջոցառմամբ. "Ապագա հայկականը" շարժման համանախաձեռնող Ռուբեն Վարդանյանը նշել էր` Հայաստանը հիմա խորը ճգնաժամի մեջ է, եթե փոփոխությունների գնալու այս պահից չօգտվենք, ապա մեր վերջը եկել է։