ԵՐԵՎԱՆ, 18 սեպտեմբերի – Sputnik. ՌԴ Պետական դումայի ընտրություններին դիտորդական առաքելություն իրականացնելու նպատակով Մոսկվա մեկնած ՀՀ ԱԺ պատվիրակության անդամ, ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը ռուսական լրատվամիջոցների հետ զրույցում անդրադարձել է եռօրյա ընտրությունների ռուսաստանյան մոդելին։
«Ռուսաստանի եռօրյա ընտրությունների անցկացման փորձը կարող է լավ օրինակ հանդիսանալ մյուս երկրների համար՝ հատկապես կորոնավիրուսի համավարակի պայմաններում: Միգուցե նման օրինակը կարող է վերածվել նոր չափանիշի»,-ասել է նա:
Հանձնաժողովի նախագահի խոսքով՝ համավարակի պայմաններում պետք է ելնել սահմանադրական այն արժեքներից, որոնք անհրաժեշտ է պաշտպանել:
Վարդանյանը նաև կարծիք է հայտնել, որ դիտորդական առաքելությունը կնպաստի ժողովրդավարության ամրապնդմանն ու Ռուսաստանում ընտրական գործընթացի թափանցիկության խորացմանը:
Նշենք, որ դիտորդական առաքելությամբ Մոսկվա մեկնած ՀՀ ԱԺ պատվիրակության կազմում են նաև Վաղարշակ Հակոբյանը, Արթուր Դավթյանը, Վահագն Հովհաննիսյանը, Նազելի Բաղդասարյանը, Ալեքսեյ Սանդիկովը։
Պատվիրակությունը Մոսկվայում կլինի սեպտեմբերի 16-20-ը։