ԵՐԵՎԱՆ, 18 սեպտեմբերի - Sputnik. Բելգիայի հիվանդանոցներից մեկն այսուհետ իր բուժառուներին կսկսի «դեղատոմսով» նշանակել թանգարաններ այցելելը։ Տեղեկությունը հայտնում է ՌԻԱ Նովոստին։
Հիվանդները ստանալու են թանգարանային անվճար տոմսեր՝ որպես լրացուցիչ թերապիա։ Տոմսերը հասանելի կլինեն, եթե հիվանդությունը կապված է քրոնիկ սթրեսի հետ: Բժիշկների կարծիքով`արվեստի գործերը կարող են զգալիորեն բարելավել մարդու առողջական վիճակը:
Բրյուսելյան թանգարաններից հինգը համաձայնել եբ ընդունել նման հյուրերի, նրանց թվում են ժամանակակից արվեստի և նորաձևության թանգարանները:
Արվեստի միջոցով սթրեսի դեմ պայքարելու գաղափարը ծագել է Կանադայում: Եվրոպայում առաջինը այդ փորձը կիրառվում է Բելգիայում։
«Թանգարանային թերապիան» կտևի մինչև 2022 թվականը: Եթե նոր բուժումն արդյունավետ լինի, ծրագիրը կընդլայնվի և կկիրառվի նաև հանրապետության մյուս հիվանդանոցներում: