Ֆրանսիայի ֆուտբոլի առաջնության ժամանակ երկրպագուները ծեծկռտուք են սարքել խաղադաշտում

ԵՐԵՎԱՆ, 18 սեպտեմբերի - Sputnik. Այսօր ֆուտբոլի Ֆրանսիայի առաջնության 6-րդ տուրում Ֆրանսիայի գործող չեմպիոն «Լիլ» և «Լանսի» ակումբների խաղի ժամանակ միջադեպ է գրանցվել։

«Լանս» ակումբի խաղադաշտում ընթացող հանդիպման ընդմիջմանը 2 թիմերի երկրպագուները նախ միմյանց հասցեին վիրավորական արտահայտություններ են արել տրիբունաներից, ապա դուրս են եկել խաղադաշտ ու զանգվածային բախում սկսել։

Երկրպագուների ծեծկռտուքի տեսանյութը Twitter–ում հրապարակել է ֆրանսիական ֆուտբոլի տեղեկատվական Get French Football News էջը։

Մարզադաշտի անվտանգության աշխատակիցներն ու ոտիկանները երկրպագուների բանակները բաժանելու ընթացքում մարմնական տարբեր վնասվածքներ են ստացել։

Կատարվածի պատճառով հանդիպումը որոշ ժամանակով դադարեցվել է ու հետաձգվել։

Ավելի ուշ խաղը շարունակվել է և ավարտվել «Լանսի» հաղթանակով՝ 1:0 հաշվով: