ԵՐԵՎԱՆ, 17 սեպտեմբերի - Sputnik. ՀՀ պետական սահմանի հետ կապված հարցերը միայն ռազմաքաղաքական տեսանկյունից դիտարկելը սխալ է, քանի որ երկրորդական պլան են մղվում մարդու իրավունքները։ Մեծ Բրիտանիայի և Հյուսիսային Իռլանդիայի թագավորության խորհրդարանի Լորդերի պալատի անդամ բարոնուհի Քերոլայն Քոքսի գլխավորած պատվիրակությանն ընդունելու ժամանակ հայտնել է ՀՀ մարդու իրավունքների պաշտպան Արման Թաթոյանը։ Տեղեկությունը հայտնում է ՀՀ ՄԻՊ–ի գրասենյակը։
Թաթոյանը ներկայացրել է հետպատերազմական փուլում ադրբեջանական իշխանությունների պատճառով ՀՀ սահմանային բնակիչների իրավունքների խախտման փաստերը։
«Թաթոյանը նշել է, որ ադրբեջանի անօրինական արարքների հետևանքով մարդիկ զրկվել են նույնիսկ դեռ խորհրդային ժամանակներից իրենց պատկանող տներից, հողատարածքներից, խոտհարքերից, որի հետևանքով առաջ են եկել ոչ միայն սոցիալական, այլ նաև անվտանգային լուրջ խնդիրներ»,–նշված է հաղորդագրության մեջ։
Մարդու իրավունքների պաշտպանը հայտնել է նաև, որ մարդիկ չեն կարողանում զբաղվել անասնապահությամբ, ինչը նրանց ընտանիքների եկամտի աղբյուրն է։ Բացի այդ, վտանգված է ջրային պաշարների հասանելիությունը ոչ միայն Սյունիքի, այլ նաև Գեղարքունիքի մարզում: Ավելին, մի շարք գյուղեր զրկված են ջրից:
Հիշեցնենք, որ պատերազմի օրերին Հայաստանի մարդու իրավունքների պաշտպան Արման Թաթոյանն ու Արցախի մարդու իրավունքների նախկին պաշտպան Արտակ Բեգլարյանն Արցախում փաստահավաք առաքելություն էին իրականացնում Քերոլայն Քոքսի մասնակցությամբ։