ԵՐԵՎԱՆ, 17 սեպտեմբերի – Sputnik. Եվրոպական միությունը տարածքային զարգացման առումով փորձում է կենտրոնացումն ուղղել դեպի հարավ՝ Սյունիքի մարզ։ ՀՀ տարածքային կառավարման և ենթակառուցվածքների նախարար Գնել Սանոսյանի հետ հանդիպման ժամանակ ասել է ԵՄ պատվիրակության ղեկավար, դեսպան Անդրեա Վիկտորինը, տեղեկանում ենք ՏԿԵՆ–ից։
"Դեսպանն ընդգծել է, որ մեծ տեղ են հատկացնում տարածքային զարգացմանը։ Այդ նպատակով բավական ակտիվ գործունեություն են ծավալում Հայաստանի հյուսիսային մարզերում, սակայն անցած տարվա զարգացումների արդյունքում իրենք փոխել են իրենց մոտեցումը և փորձում են կենտրոնացումն ուղղել դեպի հարավ՝ Սյունիքի մարզ",–նշված է հաղորդագրության մեջ։
Նախարարը շնորհակալություն է հայտնել դեսպանին Սյունիքն ուշադրության կենտրոնում պահելու համար և արձանագրել, որ երկկողմ տեսակետներն ու գործողությունները համընկնում են։ Սանոսյանն ընդգծել է, որ ԵՄ-ի կողմից Հայաստանին հատկացվող 2,6 միլիարդ եվրո աջակցության զգալի մասը հիմնականում առնչվում է ՏԿԵ նախարարությանը, նախարարության գործունեության ոլորտներին։
Հիշեցնենք, որ սեպտեմբերի 7-ին էլ ՀՀ արտգործնախարար Արարատ Միրզոյանն էր ընդունել Վիկտորինին։ Միրզոյանը բարձրացրել էր գերիների` հայրենիք վերադառնալու հարցը։