ԵՐԵՎԱՆ, 17 սեպտեմբերի – Sputnik. Ատամնաբույժ Շանթ Բեդիկյանն այս տարեսկզբին իրականացրեց իր երազանքը. բացեց «Sincere Smiles Dental» սեփական ատամնաբուժական կլինիկան։
Յուրաքանչյուր նոր պացիենտի հետ նա 12 գալոն կաթ (1 գալոնը հավասարազոր է 4,5 լիտրի) է նվիրաբերում Gleaners պարենային բանկի համար։
«Պարենային անվտանգությունը շատ կարևոր է իմ ընտանիքի համար... Կարիքավորներին սնունդով ապահովելը մի փոքր մասն է նրանից, ինչի մասին պետք է մտահոգվել», – գրում է հոդվածի հեղինակ Ջենիֆեր Թայմարը։
Նա նաև միջոցներ է ուղարկում Aid Beyond Borders բարեգործական հիմնադրամին, որն օգնում է Հայաստանի գյուղերին, ինչպես նաև արցախյան 44-օրյա պատերազմի ընթացքում տեղահանված մարդկանց։
Շանթ Բեդիկյանն իր ընտանիքի օրինակով գիտի` ինչի կարող է հանգեցնել սննդի պակասը.
«Երբ հայրս եկավ այստեղ, նա ընդամենը մեկ դոլար ուներ գրպանում և պետք է իրականացներ ամերիկյան իր երազանքը»։
Շանթի տատիկը` Ազատուհի Բեդիկյանը, փրկվել էր Ցեղասպանությունից։ Մի գիշեր, երբ նա դեռ փոքր աղջնակ էր, թուրք զինվորները կոտորեցին գրեթե նրա ամբողջ ընտանիքին։
«Համաշխարհային առաջին պատերազմի ժամանակ տեղի ունեցած Հայոց ցեղասպանության ժամանակ քրիստոնյաներին զանգվածաբար կոտորեցին, արտաքսեցին, իսկ մնացածներին բռնի ուժով ձուլեցին և ստիպեցին դառնալ մուսուլմանական, թուրքական մշակույթի մի մաս», – ասվում է հոդվածում։
Ընտանիքից հաջողվեց փրկվել միայն Ազատուհուն, նրա կրտսեր եղբորն ու քրոջը։ Երեխաները հայտնվեցին մանկատանը։
Շանթը նշում է, որ եթե այն ժամանակ չլիներ Near East հիմնադրամը, որը ձևավորվեց 1915 թվականին` ի պատասխան հայերի և ասորիների նկատմամբ Թուրքիայի վայրագությունների, իր ընտանիքն այսօր չէր բարգավաճի։
«Տատս հայտնվեց Սիրիայում։ Չգիտեմ` ինչ ավարտ կունենար ամեն ինչ, եթե չլինեին առաքյալները, որոնք սնունդ և ջուր էին հասցնում», – պատմում է նա։
Ատամնաբույժի խոսքով` իր տատն ու պապը հանդիպել են Սիրիայում, այնուհետև արտագաղթել Լիբանան, հետո էլ` Ֆրանսիա։ Միացյալ Նահանգներում նրա ընտանիքը հայտնվեց 70-ականներին։