ԵՐԵՎԱՆ, 16 սեպտեմբերի - Sputnik. ՀՀ կառավարությունն ավելացնում է օլիմպիական խաղերում բարձր ցուցանիշների հասած մարզիկների, մարզիչների ու նրանց բժիշկների պարգևատրումների չափերը։ Առաջարկն այսօր ՀՀ կառավարության նիստում ներկայացրեց ՀՀ կրթության, գիտության, մշակույթի և սպորտի նախարար Վահրամ Դումանյանը։
«Օլիմպիական խաղերում առաջին տեղը գրաված մարզիկները գործող որոշմամբ ստանում են 20 մլն դրամ։ Փոփոխության արդյունքում կստանան 25 մլն դրամ»,– ասաց Դումանյանը։
Օլիմպիական խաղերում առաջին տեղը գրաված մարզիկի անձնական մարզիչն ու հավաքականի մարզիչը կստանան 12 մլն դրամ` ներկայիս 10 մլն–ի փոխարեն, երկրորդ մարզիչն ու հավաքականի բժիշկը կստանան 5-ական մլն դրամ` ներկայիս 4 մլն–ի փոխարեն։
Օլիմպիական խաղերում 2-րդ տեղը գրաված մարզիկները գործող 15 մլն դրամի փոխարեն կստանան 20 մլն։ Նրանց անձնական մարզիչն ու հավաքականի մարզիչը ներկայիս 7.5 մլն–ի փոխարեն կստանան 10 մլն դրամ, իսկ հավաքականի երկրորդ մարզիչն ու հավաքականի բժիշկը ներկայիս 3 մլն դրամի փոխարեն կստանան 4 մլն։
Բարձրացվել են նաև օլիմպիական չեմպիոնների ցմահ անվանական թոշակների չափերը. ներկայիս 500 000–ի փոխարեն նրանք այսուհետ կստանան 1 մլն դրամ։ Օլիմպիադայում արծաթե մեդալի արժանացած մարզիկները 300 000 դրամի փոխարեն այսուհետ կստանան 700 000 դրամ, բրոնզե մեդալակիրները` 300 000–ի փոխարեն 600 000։
Դումանյանը նշեց, որ պարգևավճարների ավելացման հանձնարարությունը տվել էր ՀՀ վարչապետ Նիկոլ Փաշինյանը Տոկիոյի օլիմպիական խաղերից առաջ։