ԵՐԵՎԱՆ, 16 սեպտեմբերի - Sputnik. Բոլոր նրանց, ովքեր դեռ չեն պատվաստվել Covid-19-ի դեմ, Հռոմի պապ Ֆրանցիսկոս Առաջինը հորդորել է պատվաստվել։ Նա այդ մասին ասել է լրագրողներին`պատասխանելով պատվաստումների հանդեպ անվստահության վերաբերյալ հարցին։
Պապը տարակուսել է, թե ինչու շատ մարդիկ, այդ թվում` Հռոմի կաթոլիկ եկեղեցու որոշ կարդինալներ, հրաժարվում են պատվաստվել:
«Դա մի փոքր տարօրինակ է, քանի որ մարդկությունը պատվաստումների հետ բարեկամական պատմություն ունի, - ասել է կաթոլիկ եկեղեցու առաջնորդը։–Երեխա էինք, երբ մեզ պատվաստեցին կարմրուկի, պոլիոմիելիտի դեմ: Բոլոր երեխաները պատվաստվեցին, և ոչ ոք ոչինչ չասաց»:
Հռոմի պապը ինքն էլ պատվաստվել է Covid-19- ի դեմ և պարբերաբար հանդես է գալիս համընդհանուր խնդրի լուծման համար պատվաստվելու հորդորով:
Հիշեցնենք` անցյալ ամիս կարդինալ Ռեյմոնդ Բըրքը, որը դեմ էր արտահայտվել պատվաստումներին, վարակվել էր կորոնավիրուսով և հոսպիտալացվել ԱՄՆ-ում: