ԵՐԵՎԱՆ, 15 սեպտեմբերի -Sputnik. ՀՀ վարչապետ Նիկոլ Փաշինյանը սեպտեմբերի 16-ին Դուշանբեում կայանալիք ՀԱՊԿ Հավաքական անվտանգության խորհրդի գագաթնաժողովում կներկայացնի Հայաստանի առաջնահերթությունները, որին անցնում է կազմակերպության նախագահությունը:
Հաշվի առնելով 2021-2022 թվականներին ՀԱՊԿ-ի նախագահության անցումը Հայաստանի Հանրապետությանը, վարչապետ Նիկոլ Փաշինյանը կներկայացնի այն առաջնահերթությունները, որոնք պետք է իրականացվեն, - հայտարարել են կազմակերպության մամուլի ծառայությունում:
Միջոցառմանը կմասնակցեն ՀԱՊԿ անդամ պետությունների ղեկավարները, ինչպես նաև կազմակերպության գլխավոր քարտուղար Ստանիսլավ Զասը:
Հավաքական անվտանգության խորհրդի անդամները նաև կքննարկեն միջազգային և տարածաշրջանային անվտանգության հրատապ խնդիրները ու Հավաքական անվտանգության պայմանագրի կազմակերպության այս ժամանակահատվածի գործունեության հիմնական արդյունքները:
Ամենակարևոր հարցերից մեկը կդառնա իրավիճակն Աֆղանստանում և դրա ազդեցությունը ՀԱՊԿ անդամ պետությունների անվտանգության վրա:
ՀԱՊԿ Հավաքական անվտանգության խորհրդի նստաշրջանի ընթացքում, ինչպես սպասվում է, կընդունվի Հավաքական անվտանգության խորհրդի հռչակագիրը, ինչպես նաև կստորագրվեն մի շարք փաստաթղթեր, որոնք վերաբերում են խաղաղապահ գործունեությանը, ՀԱՊԿ զորքերի (հավաքական ուժերի) գործունեության ապահովմանը և ՀԱՊԿ-ի օպերատիվ արձագանքման ստորաբաժանմանը ժամանակակից սպառազինությամբ, ռազմական և հատուկ տեխնիկայով, հատուկ միջոցներով հագեցվածությանը։ Կքննարկվի նաև ՀԱՊԿ-ի 2022 թվականի բյուջեն: