ԵՐԵՎԱՆ, 14 սեպտեմբերի – Sputnik. ՀՀ Սյունիքի մարզպետ Մելիքսեթ Պողոսյանն այսօր ընդունել է Հայաստանում ԱՄՆ նորանշանակ փոխդեսպան Չիպ Լեյթինենին, որին ուղեկցել են դեսպանատան ռազմական կցորդը և քաղաքական ու տնտեսական գրասենյակի ղեկավարը, որոնք նույնպես նոր են նշանակվել։ Տեղեկությունը հայտնում է Սյունիքի մարզպետարանի մամուլի ծառայությունը։
Փոխդեսպանը նշել է, որ ՀՀ-ում ԱՄՆ արտակարգ և լիազոր դեսպան Լին Թրեյսիի ցանկությունն էր, որ բոլորով իրենց առաջին այցը ՀՀ-ում սկսեն Սյունիքից՝ կարևորելով դեսպանատան աշխատանքի տեսանկյունից այս մարզի առաջնահերթություն լինելը։
Լեյթինենն ասել է, որ ցանկանում է տեղում ծանոթանալ իրավիճակին և հասկանալ, թե ինչպես կարող են շարունակել աջակցել ժողովրդավարական ու տնտեսական զարգացումներին, ինչպես նաև տեղեկանալ անվտանգային խնդիրների մասին։
Մելիքսեթ Պողոսյանը, ողջունելով դիվանագետների առաջին այցը Սյունիք, ներկայացրել է հետպատերազմյան շրջանում այստեղ ստեղծված իրավիճակը, մարզի ղեկավարության ու բնակչության մտահոգությունները, խնդիրները, որոնց առնչվում են՝ պայմանավորված սահմանային նոր վիճակով։
Հանդիպման ընթացքում կողմերը քննարկել են անվտանգության, ճանապարհներին ու երթևեկությանը, տնտեսական խնդիրներին առնչվող այլ հարցեր։
Մարզպետը հետագա ակտիվ համագործակցության պատրաստակամություն է հայտնել ու խոսվել USAID-ի կողմից մարզում իրականացված ծրագրերի մասին, հույս հայտնել, որ դրանք շարունակական կլինեն։
Հիշեցնենք, որ օգոստոսի 6–ին էլ ԱՄՆ դեսպան Լին Թրեյսին էր այցելել Սյունիքի մարզ։ Նա նշել էր, որ Սյունիքը Հայաստանի իր սիրած վայրերից մեկն է, իսկ դա նշանակում է, որ նա շատ անգամներ առիթ կունենա վերադառնալ այնտեղ։