ԵՐԵՎԱՆ, 14 սեպտեմբերի – Sputnik. Մի շարք վիրուսային վարակների առանձնահատկությունն այն է, որ դրանց դեմ դեղորայք չկա, մարդու օրգանիզմը պետք է ինքնուրույն հաղթահարի հիվանդությունը։ Ինչպես արագացնել առողջացումը, радио Sputnik ռադիոյին տված հարցազրույցում պատմել է բժիշկ–թերապևտ Ալեքսեյ Խուխրևը։
Գոյություն ունեցող հակավիրուսային դեղամիջոցներն օգնում են օրգանիզմին հաղթահարել սուր շնչառական վարակ առաջացնող ոչ բոլոր պաթոգենները։ Մրսածությամբ պայմանավորված վիրուսները կանխելը ևս շատ դժվար է։ Չէ՞ որ դրա դեմ պատվաստանյութ չկա, ինչպես, օրինակ, գրիպի կամ COVID-19–ի դեպքում է։
Բայց նույնիսկ եթե հակավիրուսային դեղերն այդքան էլ լավ չեն օգնում հաղթահարել սուր շնչակռական վարակը, մարդը կարող է արագացնել իր առողջացումը իմունային համակարգն ամրացնող վիտամիններ ընդունելով, կարծում է Խուխրևը։
«Օրինակ, կարևոր է հետևել D վիտամինի մակարդակին։ Այն ուղղակիորեն ազդում է իմունիտետի արդյունավետության վրա։ Եթե ապացուցված է D վիտամինի ցածր մակարդակը և մարդը հիվանդացել է, ապա վիտամիններ խմելու ժամանակն է», – ասել է նա։
Վիրուսային վարակով հիվանդացած պացիենտը պետք է լավ քնի, բավարար քանակի առողջ սնունդ օգտագործի և առժամանակ հրաժարվի ալկոհոլից։
Այս հասարակ կանոնների խախտումը կարող է դանդաղեցնել առողջացումը։ Բացի այդ, օրգանիզմի արագ վերականգնմանը կարող է խոչընդոտել ակտիվ կյանքին արագ վերադարձը։
«Վիրուսային հիվանդությունների դեպքում շատ հաճախ արյան մեջ լեյկոցիտների մակարդակը (բջիջներ, որոնց խնդիրը վարակի դեմ պայքարն է ,– խմբ.) իջնում է։ Այդ պատճառով, եթե մարդը սկսում է «թռչկոտել» և քրտնել ու սառել, երբ դեռ կարգին չի ապաքինվել, վիրուսային վարակից բացի կարող է նաև մանրէային վարակ ձեռք բերել։ Դա միանգամից կբարդացնի իրավիճակը», – պարզաբանել է Խուխրևը։
Նա ընդգծել է, որ հիվանդը որոշ ժամանակ պետք է հանգիստ վիճակում գտնվի, որպեսզի նրա օրգանիզմը կազդուրվի վիրուսային հիվանդությամբ պայմանավորված ժամանակավոր իմունադեֆիցիտից։