ԵՐԵՎԱՆ, 13 սեպտեմբերի - Sputnik. Ռուսաստանն անում է իրենից կախված ամեն բան ԼՂ–ում իրավիճակի կարգավորմանը նպաստելու համար, բայց միամիտ է կարծել, որ նա կլուծի բոլոր հարցերը և միանգամից։ Այս մասին Sputnik Արմենիա մուլտիմեդիոն հարթակում կազմակերպած տեսակամրջի ժամանակ հայտարարեց ՌԴ սենատոր, Դաշնային խորհրդի արտաքին գործերի հանձնաժողովի անդամ Անդրեյ Կլիմովը։
«Ես չէի ցանկանա, որ ԼՂ–ում իրավիճակի պատասխանատվությունը բարդվի բացառապես Ռուսաստանի վրա։ Այդ մոտեցումը խանգարում է տրամաբանորեն դատելուն և խելամիտ որոշումներ կայացնելուն։ ԼՂ–ում իրավիճակը այսօր չի ստեղծվել, և Ռուսաստանի պատասխանատվությունը համեմատել չի կարելի հակամարտության այդ գոտու մյուս կողմերի պատասխանատվության հետ», – ասել է սենատորը։
Նրա խոսքով` Մոսկվան ամենից քիչն է շահագրգռված սեփական սահմանների մոտ պատերազմով, իսկ անցած տարի հենց Ռուսաստանն է արագության և արդյունավետության առումով աննախադեպ միջոցներ ձեռնարկել հակամարտության գոտի խաղաղապահներ ուղարկելու հարցում։ Եվ այն, որ այսօր այնտեղ պատերազմ չկա, 99,9%–ով Մոսկվայի վաստակն է, ընդգծել է սենատորը։
Sputnik Արմենիայի այն հարցին, թե արդյոք Ղարաբաղում ապրող և պատերազմի ժամանակ և հետո այնտեղից մեկնած ՌԴ քաղաքացիների թվի վերաբերյալ տվյալներ կան, Կլիմովը հայտարարել է, որ կոնկրետ վիճակագրություն չկա։ Այնուամենայնիվ, նա գիտի, որ Ղարաբաղում` իրենց ռուս համարող շուրջ 1500 մարդ է բնակվում։ Հակամարտությունից առաջ նրանց թիվն ավելի մեծ էր։
«Ձեռքը սրտին դնելով ասենք, որ Հայաստանում կամ Ադրբեջանում այսօր ոչ ոք չգիտի, թե ով, որտեղ և ինչ թվով է գտնվում։ Բայց դա չէ կարևոր։ Կարևորը, որ խաղաղությունն իրական լինի, որպեսզի պայմանավորվածությունները կատարվեն ողջ ծավալով»,–կարծում է ՌԴ քաղաքական գործիչը։
Կլիմովը փաստում է, որ այդ պայմանավորվածությունների վերաբերյալ դժգոհություններ կան, այնուամենայնիվ, անհրաժեշտ է լուծել հետպատերազմյան խնդիրները. դրանք և՛ գերեվերված անձանց, և՛ ականապատ դաշտերի հետ կապված խնդիրներն են։
Ինչ վերաբերում է ԼՂ–ում ռուս խաղաղապահների ներկայությանը, ապա, ըստ քաղաքական գործչի, զորակազմը կմնա այնտեղ այնքան ժամանակ, քանի դեռ պետք է։ Կլիմովը վստահեցրել է, որ Ռուսաստանը օբյեկտիվորեն շահագրգռված է սեփական սահմանների երկայնքով խաղաղության պահպանման մեջ։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: