ԵՐԵՎԱՆ, 11 սեպտեմբերի – Sputnik. Ռուսական խաղաղապահ զորախմբի մարդասիրական արձագանքման կենտրոնի մասնագետները Հայաստանից ջրի տարաներ են տեղափոխել Լեռնային Ղարաբաղ։ Տեղեկությունը հայտնում է Ռուսաստանի պաշտպանության նախարարության մամուլի ծառայությունը` նշելով, որ տարաները նախատեսված են դպրոցների ու մանկապարտեզների համար։
Հատուկ բեռը կփոխանցվի այն դպրոցներին ու մանկապարտեզներին, որոնք գտնվում են սահմանագծման գծի մոտ գտնվող հեռավոր շրջաններում։
Լեռնային Ղարաբաղի շրջաններում ջրամատակարարման ընդհատումների պատճառով ռուսական խաղաղապահ զորախմբի հրամանատարությունը որոշել է օգնություն ցուցաբերել տարածաշրջանի բնակչությանը: Երկու շաբաթվա ընթացքում խաղաղապահ զորախմբի մարդասիրական կենտրոնի զինծառայողներն ավելի քան 30 երթ են իրականացրել ու ավելի քան 200 տոննա խմելու ջուր տեղափոխել Ստեփանակերտի մեկուկես հազար բնակիչների:
Նախօրեին խաղաղապահների աջակցությամբ Մարտունու շրջանի սահմանազատման գծի մոտ ջրատար հոր է գործարկվել, որը խմելու ջրով կապահովի ավելի քան 2 հազար մարդու:
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: