ԵՐԵՎԱՆ, 8 սեպտեմբերի - Sputnik. ԱԺ «Հայաստան» խմբակցության պատգամավոր Գեղամ Նազարյանը, որը նաև 44–օրյա պատերազմում զոհված Աբգար Նազարյանի հայրն է, բոլոր այն երգիչներին, երաժիշտներին, արտիստներին, որոնք պատրաստվում են ելույթ ունենալ սեպտեմբերի 21–ին Հանրապետության հրապարակում կայանալիք «գունագեղ» շոուի ժամանակ, հորդորում է հրաժարվել այդ մտքից։
Կառավարության վերջին նիստի ժամանակ ՀՀ վարչապետ Նիկոլ Փաշինյանը հայտարարել էր, որ սեպտեմբերի 21-ին շուքով կնշվի Հայաստանի Հանրապետության անկախության 30-ամյակը, Հանրապետության հրապարակում լինելու է մասշտաբային ու գունագեղ տոնակատարություն։
Նազարյանի խոսքով`սեպտեմբերի 21-ին՝ Հայաստանի անկախության օրը, Հանրապետության հրապարակում գունագեղ տոնակատարությամբ ոչ թե հարգելու են հերոս տղերքին, այլ պարզապես տոնելու են թշնամու հաղթանակը։
Զոհված զինծառայողի հայրը վստահ է, որ հանրությունը պետք է կանգնի զոհված տղերքի ընտանիքի անդամների կողքին, որոնք վարչախմբից պահանջում են չեղարկել գունագեղ շոուն։
«Բոլոր այն երգիչները, երաժիշտները, արտիստները, որոնք պատրաստվում են ելույթ ունենալ գունագեղ շոուի ժամանակ, պետք է հասկանան, գիտակցեն, թե ինչ տոնակատարության են մասնակցում, պետք է ընկալեն, որ համերգին իրենց մասնակցությամբ կանգնում են մեր հերոս տղերքի արյան վրա։ Այս ամենն անցնելու է, գալու է նոր իրականություն, բայց հիշվելու են նրանց անունները, ովքեր երգել, նվագել կամ պարել են այս խայտառակ տոնակատարության ժամանակ»,–Facebook–ի իր էջում գրել է նա։
Նազարյանի խոսքով` զոհված տղերքն ամենաթանկն են տվել հայրենիքին, բայց բոլոր նրանք, ովքեր կասեն, թե երգում են, պարում են, որ աշխատանքից չզրկվեն, որ ներկա են համերգին միայն այն պատճառով, որ պարգևավճար ստանան, թող հիշեն այդ մասին։
«Տղերքը հայրենիքի համար կյանքն են տվել, իսկ մենք գոնե պետք է պատրաստ լինենք նրանց համար զրկվել աշխատանքից կամ պարգևավճարից»,–շեշտել է զոհվածի հայրը։
Ավելի վաղ Նազարյանը գրել էր, որ պատերազմի առաջին տարելիցից վեց օր առաջ գունագեղ համերգի կազմակերպումը և հայտարարությունը, թե այն նվիրվում է նահատակներին, ցինիզմ ու սրբապղծություն է։
Կառավարության որոշմամբ` սեպտեմբերի 20-ը և 21–ը ոչ աշխատանքային օրեր կլինեն։ Սեպտեմբերի 20-ի փոխարեն քաղաքացիները կաշխատեն սեպտեմբերի 25-ին։