ԵՐԵՎԱՆ, 10 սեպտեմբերի - Sputnik. Պետության մոտեցումը գինեգործների ու գյուղացիների միջև վեճերում անփոփոխ է. պետք է երկարաժամկետ պայմանագրերով աշխատել: Sputnik Արմենիայի հետ զրույցում տեղեկությունը հայտնեց ՀՀ էկոնոմիկայի գյուղատնտեսության գծով փոխնախարար Արման Խոջոյանը (մեկնաբանելով Արարատի մարզում երեկվա միջադեպը, երբ գյուղացիները փակել էին միջպետական ճանապարհը` բողոքելով ցածր գնով խաղող մթերող գործարանների դեմ)։
Նրա խոսքով՝ նախարարության բացատրություններում գործարանատերերը նշում են, որ ոչ ոք խաղողը մեկ կիլոգրամի դիմաց 115 դրամից ցածր գնով չի գնում, ընդ որում` գործարանները պատրաստ են մեծ քանակությամբ բերք գնել, առավել ևս, որ կառավարությունը նրանց սուբսիդավորում է բերքի գնման վարկերի տոկոսները: Փոխնախարարը նշեց, որ գյուղացիներին ձեռնտու է, որ այդ վարկերից ստացված գումարները փոխանցվում են անմիջապես նրանց, այսինքն` պետք չէ սպասել՝ երբ գործարանն իրենց կվճարի։
«Հարցը միայն այն է, որ գործարաններն ուզում են ցածր գնով խաղող գնել։ Այսինքն՝ նրանք պատրաստ են մեծ ծավալներով գինի կամ կոնյակ արտադրել (կամ թարմ խաղող արտահանել), բայց ավելի ցածր գնով, քանի որ ոչ միայն մեր, այլև արտասահմանյան սպառողների վճարունակությունն է նվազել», - ավելացրեց Խոջոյանը։
Այնուամենայնիվ, նա նշեց, որ գնման հետ կապված խնդիրներ չեն լինի, եթե գյուղացիները համաձայնեն գինու-կոնյակի գործարանների (կամ սեղանի խաղող արտահանողների) հետ աշխատել:
«Ես չգիտեմ դեպք, որ գործարանը պայմանագիր ունենա գյուղացու հետ, ու հրաժարվի կատարել այն։ Բայց գործարանն իր հերթին ուզում է ի քանի տարով պայմանագիր կնքել, որ գյուղացիները պարբերաբար բերքը հանձնեն իրեն, ոչ թե ուրիշներին», - ավելացրեց փոխնախարարը։
Նա ավելացրեց, որ այսպես թե այնպես, կառավարությունը կշարունակի բանակցություններ վարել գործարանատերերի հետ, որ այս տարի կրկին հնարավոր լինի ընդունելի գներով մթերել ամբողջ գյուղմթերքը:
Նշենք, որ այսօր գյուղացիների հետ հանդիպման համար Արարատի մարզ էր մեկնել ՀՀ էկոնոմիկայի նախարար Վահան Քերոբյանը: