ԵՐԵՎԱՆ, 10 սեպտեմբերի – Sputnik. Ընդդիմությունը ՀՀ տեղական ինքնակառավարման մարմինների առաջիկա ընտրությունները դիտարկում է որպես հնարավորություն ամրացնել դիրքերը հնարավոր ներքաղաքական ճգնաժամից առաջ, Sputnik Արմենիայի հետ զրույցում ասաց քաղտեխնոլոգ Վիգեն Հակոբյանը։ Նա հասկանալի է համարում նաև իշխանությունների շահագրգռվածությունը խորհրդարանական ընտրություններին գրանցած հաջողությունն ամրապնդելու հարցում։
«Ներկայիս ղեկավարությունը փորձում է ավարտին հասցնել իշխանության ուղղահայացի կառուցումը։ Նա հասկանում է, որ քաղաքական ճգնաժամը դե ֆակտո չի ավարտվել, և իրավիճակի որոշակի զարգացման դեպքում այն կարող է թեժ փուլ անցնել, կամ նոր ճգնաժամեր առաջանալ։ Այդ թվում ընտրական գործընթացների հետ կապված», – ասաց Հակոբյանը։
Նրա կարծիքով` իշխանությունները պայքարում են, որպեսզի նման իրավիճակում վարչական ռեսուրներին հասանելիություն ստանան։
Ինչ վերաբերում է ընդդիմությանը, ապա այն ևս որոշ ներքաղաքական գործընթացների հույս ունի, ընդ որում` պարտադիր չէ, որ դրանք կապված լինեն ընտրությունների հետ։ Տեղական իշխանություններն ու ռեսուրսները կարող են նրանց համար վճռական նշանակություն ունենալ։
Այդպիսով, և՛ իշխանությունը, և՛ ընդդիմությունը լրջորեն նախապատրաստվում են ներքաղաքական իրավիճակի հնարավոր սրացմանը։
Քաղտեխնոլոգի խոսքով` խորհրդարանական ընտրությունները հաշվի առնելով՝ ներկա պահին կարող է տպավորություն ստեղծվել, որ ՔՊ–ական թեկնածուների հաղթանակը կանխորոշված է։
Սակայն ընդդիմությունը որոշել է մասնակցել տարբեր ձևաչափերում, որոնք չեն եղել, օրինակ, ԱԺ–ի ընտրությունների ժամանակ։ Յուրաքանչյուր կոնկրետ համայնքում նրանք ելնելու են իրական հնարավորություններից և ռեսուրսներից։
«Յուրաքանչյուր վայրում ընդդիմությունը տարբեր խնդիրներ է լուծելու։ Որոշ համայնքներում պայքարելու է հաղթանակի, մյուսներում` ավագանիում առավելագույնս ներկայացված լինելու համար»,– նշեց Հակոբյանը։
Ավագանիում ցանկացած ներկայացվածություն կարող է դիտարկվել որպես պլացդարմ ապագայի համար։ Օրինակ, ավելի վաղ «Հայաստան» դաշինքը հայտարարում էր, որ ստացած մանդատները դիտարկում է որպես «խրամատ»՝ ապագա պայքարի համար։
«Այսինքն ավագանու ընտրությունները պետք է դիտարկել որպես նախնական փուլ, հավանաբար, նոր ներքաղաքական գործընթացների համար», – նշեց Հակոբյանը։
Միևնույն ժամանակ այսօր դժվար է խոսել այն մասին, թե երբ կգա այդ «ապագան»։ Բնականաբար, իշխանություններն ուզում են այնպես անել, որ այդ ընտրական կամ ոչ ընտրական երևույթները հնարավորինս ուշ լինեն։