ԵՐԵՎԱՆ, 10 հոկտեմբերի – Sputnik. Տավուշի Դիլիջան քաղաքում հոկտեմբերի 17–ին սպասվող ՏԻՄ ընտրությունները «Իրավունքի» տեղեկություններով թեժ են լինելու։
Թերթը գրում է, որ Դիլիջանում որպես քաղաքապետի թեկնածու պատրաստվում են առաջադրվել բավական լուրջ ռեսուրսներ ունեցող դեմքեր:
«Մեր աղբյուրների փոխանցմամբ` Դիլիջան համայնքի ղեկավարի պաշտոնակատար Դավիթ Սարգսյանը լինելու է իշխող «Քաղաքացիական պայմանագիր» կուսակցության թեկնածուն, իսկ «Հայաստան» դաշինքը մտադիր է առաջադրել Տավուշի մարզի նախկին դատախազ Արմեն Մանթաշյանի թեկնածությունը: Ի դեպ, նա առավել հայտնի է ոչ թե իր դատախազական գործունեությամբ, որքան գործարար համբավով»,–գրում է թերթը:
Ըստ էության`ընդդիմադիր դիլիջանցիները պատրաստվում են կոնսոլիդացվել հենց նրա շուրջ։
Նյութն ամբողջությամբ կարդացեք թերթի այսօրվա համարում։
Նշենք, որ հոկտեմբերի 17-ին Շիրակի մարզի Գյումրի, Սյունիքի մարզի Գորիս, Մեղրի, Տաթև, Տեղ և Տավուշի մարզի Դիլիջան համայնքներում տեղի կունենան համամասնական ընտրակարգով անցկացվող համայնքների ավագանիների հերթական ընտրությունները:
Գորիսի՝ ներկայումս կալանքի տակ գտնվող քաղաքապետ Առուշ Առուշանյանը ևս կմասնակցի ՏԻՄ ընտրություններին «Առուշ Առուշանյան» դաշինքով, որը ստեղծվել է «Վերածնվող Հայաստան» և «Ազգային օրակարգ» կուսակցությունների միավորմամբ։
Հայ ազգային կոնգրեսի ցուցակը կգլխավորի ՀԱԿ անդամ, Գորիսի պետական քոլեջի տնօրեն, Գորիսի գործող ավագանու անդամ Կարեն Լազարյանը։
Ինչպես արդեն հայտնել էինք, իշխող «Քաղաքացիական պայմանագիր» կուսակցությունը ևս մասնակցության հայտ է ներկայացրել նշված համայնքների ՏԻՄ ընտրություններին։ Արդեն հայտնի է, թե կուսակցությունից ովքեր կգլխավորեն ընտրական ցուցակները։