ԵՐԵՎԱՆ, 10 սեպտեմբերի - Sputnik. Սյունիքի մարզի ընդհանուր իրավասության դատարանում՝ դատավոր Գնել Գասպարյանի նախագահությամբ, այսօր կայացել է Առուշ Առուշանյանի և Լուսինե Ավետյանի գործով առաջին դատական նիստը։ Գործի՝ դատաքննության նախապատրաստման փուլում դատարանը քննարկել է Գորիսի համայնքապետ Առուշ Առուշանյանի խափանման միջոցի փոփոխման հարցը։ Այս մասին Sputnik Արմենիային հայտնեց պաշտպան Արմեն Մելքոնյանը։
Մասնավորապես, պաշտպանության կողմը միջնորդություն է ներկայացրել դատարան՝ Առուշանյանի նկատմամբ ընտրված խափանման միջոց կալանավորումը 20 մլն դրամ գրավով փոխարինելու վերաբերյալ։
Դատարան ներկայացված միջնորդության հիմքում դրվել է այն հանգամանքը, որ մինչդատական վարույթն ավարտվել է, փաստացի դատավարական մեկ փուլ արդեն ավարտված է և այն քննությանը խոչընդոտելու հավանականությունը, որը մինչդատական վարույթում դատարաններն արձանագրել են, ըստ պաշտպանության կողմի, նվազման աստիճան ունի, քանի որ քրեական գործով արդեն հարցաքննվել են բոլոր վկաները։ Պաշտպանության կողմի դիտարկմամբ՝ ՄԻԵԴ որոշումների համաձայն՝ քննությանը խոչընդոտելու հիմքը նվազում է այնքանով, որքանով դատավարական ինչ-որ փուլ ավարտվում է։
Փաստաբան Էրիկ Ալեքսանյանը «Փաստինֆո»-ի հետ զրույցում ընդգծել է, որ որևէ վկայի վրա ազդեցություն գործադրելու տրամաբանություն, նպատակ չկա, որովհետև փաստացի վկաներից որևէ մեկը մեղադրական բնույթի ցուցմունք չի տալիս։ Ինչ վերաբերում է Լուսինե Ավետյանի ցուցմունքին, ապա Ալեքսանյանը հայտնեց, որ միանշանակ չի կարելի ասել, որ Լուսինե Ավետյանը միայն մեղադրական բնույթի ցուցմունք է տվել, նա նաև արդարացնող բնույթի ցուցմունք է տվել և, ըստ էության, Ավետյանի նկատմամբ ևս ազդեցություն գործադրելու նպատակ և շարժառիթ չկա այնքանով, որքանով նա նաև արդարացնող բնույթի ցուցմունք է տալիս և դատարանը հետագայում պետք է գնահատի այդ ցուցմունքները։
Գորիսի համայնքապետ Առուշ Առուշանյանը չի մասնակցել միջնորդության քննությանը, քանի որ ունի առողջական խնդիրներ և դժվարությամբ է հաղթահարում Երևան-Գորիս ճանապարհը։
Հիշեցնենք, որ Առուշանյանը կալանավորվել է հուլիսի 16-ին:
Գորիսի համայնքապետին մեղադրանք է առաջադրվել ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով և 38-154.2-րդ հոդվածի 3-րդ մասով (քվեարկության գաղտնիությունը խախտելը, ընտրական իրավունքի իրականացմանը խոչընդոտելը)։