ԵՐԵՎԱՆ, 9 սեպտեմբերի – Sputnik. Սյունիքի մարզում` Երևան-Մեղրի ավտոճանապարհի 329 կմ հատվածում, ավտովթար է տեղի ունեցել։ Տեղեկությունը հայտնում է shamshyan.com–ը։
Այսօր` ժամը 11։50-ի սահմանում իրանական համարանիշներով «Scania» մակնիշի ավտոմեքենան, դեպի Կապան ընթանալիս, դուրս է եկել հանդիպակաց երթևեկելի գոտի և բախվել դեպի Քաջարան ընթացող Կապան-Քաջարան երթուղին սպասարկող ուղևորատար «Գազելին»։
Վթարից հետո 6 հոգու տարբեր աստիճանի մարմնական վնասվածքներով տեղափոխել են «Քաջարան» բժշկական կենտրոն։
Տուժածներին առաջինը օգնության են հասել քաղաքացիներն ու օպերատիվորեն ժամանած փրկարարները։
Ոստիկանությունը պարզում է վարորդների և տուժածների ինքնությունը։