ԵՐԵՎԱՆ, 9 սեպտեմբերի - Sputnik. Արարատի մարզի խաղողագործները Տափերական գյուղի հատվածում այսօր փակել են Երևան-Երասխ ճանապարհը: Նրանք բողոքի ակցիա են իրականացնում և պահանջում գինու-օղու ձեռնարկություններից են մթերել իրենց բերքը։
Sputnik Արմենիայի հետ զրույցում Տափերականի գյուղապետարանի աշխատակից Մուշեղ Ղազարյանն ասաց, որ գյուղացիներն անցյալ տարի նախնական պայմանագրեր են կնքել «Vedi Alco» ընկերության հետ: Այժմ ձեռնարկության ղեկավարությունն ասում է, որ չի կարող մթերել ամբողջ խաղողը։
Տափերականում նույնպես գործարան կա, բայց այն հրաժարվում է խաղող մթերել։ Տարածաշրջանում գործող մյուս ձեռնարկությունները համաձայն են ընդունել խաղողը, սակայն մեկ կիլոգրամի դիմաց 115-120 դրամով։ Գյուղացիներին այդ գինը ձեռնտու չէ, նրանք խնդրում են գնել գոնե 140-150 դրամով։
«115 դրամը ինքնարժեքից ցածր է։ Թող գոնե 25-30 դրամ ավելացնեն, որ գյուղացիները ինչ-որ օգուտ ստանան», - ասաց Ղազարյանը։
Այս պահին ոստիկանները փորձում են ուժով բացել ճանապարհը՝ գյուղացիներին հետ մղելով մայրուղուց։
Հիշեցնենք` կառավարության սեպտեմբերի 2-ի նիստում ՀՀ էկոնոմիկայի նախարար Վահան Քերոբյանը հայտարարեց, որ այս տարի խաղողի մթերման հետ կապված խնդիրներ Հայաստանում չեն լինի։
«Այն պլանները, որոնք ունեն մթերողները, թույլ են տալիս հուսալ, որ այս տարի մթերումների հետ կապված մեծ խնդիր չենք ունենա, և կանխատեսվում է մթերել 180 000 տոննայի չափ խաղող»,– ասել էր նաարարը։
Նա նաև վստահություն էր հայտնել, որ ամբողջ բերքը կմթերվի, մեծ մասը կարտահանվի, գյուղացիներն էլ ճանապարհներ չեն փակի։