ԵՐԵՎԱՆ, 9 սեպտեմբերի - Sputnik․ Եվրամիությունը Հայաստանին հեռացրել է համավարակաբանական տեսանկյունից ապահով երկրների ցանկից։ ԵՄ խորհուրդը որոշել է նվազեցնել համաճարակաբանական տեսանկյունից ապահով երկրների թիվը՝ ցանկից հանելով 6 երկիր: Այդ երկրներն են Ալբանիան, Հայաստանը, Ադրբեջանը, Բրունեյը, Ճապոնիան և Սերբիան: Տեղեկությունը հայտնում է ՌԻԱ Նովոստին։
Սա նշանակում է, որ ԵՄ անդամ երկրներին խորհուրդ է տրվում վերականգնել մուտքի սահմանափակումները տվյալ երկրներից ժամանող ճանապարհորդների համար, որոնց ավելի վաղ թույլատրվել էր առանց սահմանափակումների այցելել ԵՄ և Շենգեն գոտու երկրներ:
Սահմանափակումները ենթադրում են թեստավորում, կրկնակի թեստավորում, կարանտին կամ ընդհանրապես մուտքի արգելք չպատվաստված անձանց համար:
Այն պետությունները, որոնց դեպքում ԵՄ երկրներին առաջարկվում է հանել ճանապարհորդության սահմանափակումները, այժմ 13–ն են` Ավստրալիա, Բոսնիա և Հերցեգովինա, Կանադա, Հորդանան, Նոր Զելանդիա, Կատար, Մոլդովա, Սաուդյան Արաբիա, Սինգապուր, Հարավային Կորեա, Ուկրաինա, Ուրուգվայ և Չինաստան:
ԵՄ խորհուրդը երկու շաբաթը մեկ վերանայում է այս ցանկը: Միաժամանակ առաջարկությունը չի նշանակում, որ ԵՄ բոլոր երկրները պետք է մեխանիկորեն բացեն իրենց սահմանները ցուցակում ընդգրկված պետություններից եկող բոլոր ճանապարհորդների համար: Յուրաքանչյուր երկիր ինքն է որոշում, թե որ երկրից և ինչ պայմաններով թույլ տա մուտք գործել իր տարածք։
ՀՀ առողջապահության նախարարությունն այսօր հայտնել էր, որ COVID-19-ի տարածման և դեպքերի կտրուկ աճով պայմանավորված` Հայաստանը կրկին հայտնվել է Եվրամիության չափանիշներով համաճարակային վտանգավոր «կարմիր» գոտում։
Հիշեցնենք, որ դեռ ամռան սկզբին Հայաստանը «կարմիր» գոտուց շարժվում էր դեպի «կանաչ», սակայն ընդամենը մեկ ամսում նոր՝ «դելտա» շտամի արագ տարածման հետևանքով Հայաստանը համաճարակաբանական տեսանկյունից կրկին համարվում է ոչ ապահով երկիր:
Նշենք, որ Հայաստանում կորոնավիրուսով վարակվածների թիվը վերջին մեկ օրում ավելացել է 587-ով և դարձել 246997: